Jimco, Luulyo 24, 2026
Addis Ababa, Itoobiya (AX) — Guddoomiyaha Guddiga Midowga Afrika, Mahmoud Ali Youssouf, ayaa si adag u cambaareeyay weerarro ay sheegteen kooxda Xuutiyiinta Yemen oo lagu qaaday maraakiib ganacsi oo shidaal sida oo marayay Badda Cas, isaga oo ka digay in iska horimaadka sii kordhaya uu halis gelinayo xasilloonida gobolka iyo ganacsiga caalamka.
Cambaareyntiisa ayaa timid kaddib markii Xuutiyiintu ku dhawaaqeen go’doomin badeed oo ka dhan ah Sacuudi Carabiya.
“Tallaabooyinkani waxay muujinayaan xaalad khatar ah oo sii cakirmaysa, taas oo cawaaqib culus ku yeelan karta nabadda iyo amniga gobolka,” ayuu Midowga Afrika ku yiri bayaan uu soo saaray Khamiistii.
Youssouf ayaa muujiyay garab-istaagga buuxa ee Midowga Afrika uu la leeyahay Sacuudi Carabiya, isaga oo mar kale xaqiijiyay taageerada ururka qaaraddu u hayo madax-bannaanida, amniga iyo xasilloonida boqortooyada.
Wuxuu ka digay in bartilmaameedsiga maraakiibta ganacsiga iyo isku dayga lagu carqaladeynayo isu-socodka badda ay khatar ku yihiin amniga badaha caalamka iyo habsami u shaqeynta mid ka mid ah marin-biyoodyada ugu muhiimsan istaraatiijiyad ahaan dunida.
Wuxuu sheegay in sharciga caalamiga ahi uu waajibinayo in si buuxda loo ixtiraamo xorriyadda socdaalka badda iyo badqabka maraakiibta ganacsiga.
Youssouf ayaa amniga marinnada maraakiibta ee Badda Cas ku tilmaamay mid istaraatiijiyad ahaan muhiim u ah Afrika. Wuxuu ka digay in carqalad kasta oo ku timaadda isu-socodka ganacsigu ay dhaawici karto isku xirka badaha gobolka, silsiladaha sahayda caalamka, amniga tamarta iyo danaha dhaqaale ee dalalka Afrika ee ku tiirsan helitaanka ammaan ah ee marinnadaas badeed.
Wuxuu Xuutiyiinta ugu baaqay inay si degdeg ah u joojiyaan weerarrada ka dhanka ah maraakiibta ganacsiga, kana fogaadaan tallaabooyin sii kordhin kara xiisadaha, isla markaana u hoggaansamaan sharciga caalamiga ah ee nidaamiya socdaalka badaha.
Guddoomiyaha Midowga Afrika ayaa sidoo kale mar kale taageeray hindisayaasha heer gobol iyo heer caalami ee lagu doonayo in lagu dejiyo colaadda, lagu ilaaliyo amniga badaha, laguna horumariyo xal nabadeed oo wada-hadal lagu gaaro oo laga hirgeliyo gobolka Badda Cas iyo guud ahaan Bariga Dhexe.
Soomaaliya ayaa Arbacadii sidoo kale si adag u cambaareysay hanjabaadaha Xuutiyiinta ee ka dhanka ah Sacuudi Carabiya, iyadoo cambaareysay tallaabooyin ay sheegtay inay halis gelinayaan amniga badaha, xorriyadda socdaalka badda iyo ganacsiga caalamiga ah.
Wasaaradda Arrimaha Dibadda iyo Iskaashiga Caalamiga ah ee Soomaaliya ayaa bayaan ay soo saartay ku sheegtay in dowladda federaalku ay weli ka go’an tahay ilaalinta madax-bannaanida, amniga iyo wadajirka dhuleed ee dowladaha, iyo sidoo kale ixtiraamka sharciga caalamiga ah.
