Ethel Caterham ayaa u dabaaldegtey dhalashadeeda 117-aad ee UK, iyadoo ku sababaysay in hab nololeed dheellitiran uu ka caawiyay inay gaarto heerkan layaabka leh.
Marwo Caterham waa qofkii ugu horreeyay ee la diiwaangeliyey ee noolaa ilaa 117 jir, waxayna ka mid tahay kaliya 13 qof oo taariikhda la diiwaangeliyey ku gaadhay da’daas.
- Advertisement -
Iyadoo hadda ku nool guri daryeel oo ku yaalla Surrey, waxay sheegtay in mabda’eeda hagaya uu ahaa in “wax kasta oo nolosha ku jira la raaxaysto balse si dhexdhexaad ah”.
“Anigu cidna lama murmo. Waan dhagaystaa waxa ay sheegayaan, dabadeedna waxaan sameeyaa sida aan anigu rabo,” ayay raacisay.
Markii ay 18 jir ahayd, Marwo Caterham waxay markab ugu safartay Hindiya si ay uga shaqeyso xannaaneyso carruurta. Markii dambe waxay ku soo laabatay England waxayna guursatay sarkaal ka tirsanaa ciidanka Britain.
Ninka ugu da’da weyn dunida João Marinho Neto ayaa fariin dhalasho u diray Ethel Caterham
Lammaanuhu waxay markii dambe ku noolaadeen Gibraltar iyo Hong Kong, halkaas oo ay ku koreeyeen laba gabdhood.
Marwo Caterham waxay sii haysatay madaxbannaanideeda ilaa da’ dambe. Geeridii ka dib ninkeeda, waxay baratay wadista baabuurta iyadoo 67 jir ah, waxayna sii waday wadista ilaa ay ka gaadhay 97 jir.
Salaamaha dhalashada waxa kale oo ay ka timid ninka ugu da’da weyn dunida, kaas oo ku nool Brazil.
João Marinho Neto, oo 113 jir ah, ayaa sawir lagu qaaday isaga oo dhoolla-caddaynaya isla markaana haya farriin ay ku qoran tahay “Parabéns Ethel” — oo af-Portaqiis ahaan ka dhigan “Hambalyo Ethel.”
Mudane Marinho Neto ayaa sidoo kale u diray Marwo Caterham hambalyada dhalashada sannadkii hore, markaas oo ay u dabaaldegaysay inay gaadhay 116 jir.
