Madaxweynaha Suuriya Ahmed al-Sharaa ayaa soo dhaweeyay go’aanka Washington ee Suuriya looga saarayo liiska dalalka taageera argagixisada, isaga oo tallaabadaas ku tilmaamay horumar weyn oo lagu fududeynayo cunaqabataynta.
“Maanta, Suuriya waxay iska maydhaysaa ceeb madow waxayna ka siibaysaa bog xanuun badan oo ka mid ah taariikhdeedii hore si ay u gasho jidka horumarka, dib-u-dhiska iyo dib u soo kabashada,” ayuu Mr Sharaa ku sheegay khudbad.
- Advertisement -
Go’aanka Maraykanka ayaa soo afjaraya magacaabis socotay tobannaan sano oo ku soo rogtay Suuriya xayiraado dhaqaale oo baahsan, wuxuuna calaamad kale u yahay xidhiidhka sii wanaagsanaanaya ee labada dal tan iyo ridistii 2024 ee hoggaamiyihii Suuriya Bashar al-Assad.
Wasaaradda Maaliyadda ayaa ku dhawaaqday khafiifin la xiriirta cunaqabataynta.
Wasaaradda Arrimaha Dibadda ee Maraykanka ayaa sidoo kale kala noqotay magacaabistii Jabhadda al-Nusra — oo markii dambe loo yaqaanay Hay’at Tahrir al-Sham (HTS) — inay tahay urur argagixiso caalami ah.
Mr Sharaa ayaa hoggaaminayay kooxdaas, taas oo qaaday weerarkii degdega ahaa ee xukunka ka tuuray Mr Assad.
Jabhadda al-Nusra waxay mar ahayd garabkii Al-Qaeda ee Suuriya ka hor intii aysan xiriirka u jarin shabakaddaas sannadkii 2016.
Maamulka cusub ee Suuriya ayaa raadinaya maalgashi ka caawiya soo nooleynta dalka iyo dayactirka kaabeyaasha dhaqaalaha ee ay burburiyeen in ka badan toban sano oo dagaal sokeeye ah.
Maraykanku wuxuu markii ugu horreysay bishii Luulyo ku dhawaaqay inuu damacsan yahay inuu Suuriya ka saaro liiska dalalka taageera argagixisada, go’aan si weyn loogu arkay muujin kalsooni oo loo hayo Mr Sharaa.
Tallaabadii shalay waxay Suuriya siisay “waddo ay ku gaadho barwaaqo”, ayuu yiri Xoghayaha Arrimaha Dibadda ee Maraykanka Marco Rubio.
Waxay “ka saaraysaa caqabadihii waaweynaa ee ugu dambeeyay ee hortaagnaa maalgashiga waaxda gaarka loo leeyahay ee Suuriya waxayna dhiirrigelinaysaa soo kabashada dhaqaale ee Suuriya iyo dib ugu milanka dhaqaalaha caalamka,” ayuu ku yiri bayaan.
Wasiirka Arrimaha Dibadda ee Suuriya Assad al-Shaibani ayaa go’aanka Washington ku tilmaamay “heer taariikhi ah”, isaga oo sheegay inuu muujinayo “go’naanta dowladda cusub ee Suuriya ee nabadda iyo amniga caalamiga ah”.
Wasiirka Maaliyadda Mohammed Barnieh ayaa tallaabadaas ku tilmaamay “guul u soo hoyatay diblomaasiyadda Suuriya”, sida ay sheegtay wakaaladda wararka rasmiga ah ee SANA.
Waxay “furaysaa albaab weyn oo muddo dheer la sugayay oo lagu xoojinayo ku biirista Suuriya ee nidaamka dhaqaale iyo maaliyadeed ee caalamka, lagu soo jiidanayo maalgashi iyo teknoolojiyado casri ah, laguna taageerayo fursadaha horumarineed”.
