Saddex duuliye oo Iiraani ah oo la qabtay kadib markii diyaaradaha dagaalka ee ay wateen ay ku burbureen marxaladihii hore ee dagaalka Bariga Dhexe ayaa weli ku sugan Qadar, sida ay sheegeen mas’uuliyiinta Iiraan, kuwaas oo ku boorriyey dawladda Khaliijka inay ku wareejiso.
Iiraan ayaa hore u shaacisay in hal duuliye uu dhintay halka kuwo kalena la la’yahay kadib hawlgal dhacay bishii Maarso oo ku wajahnaa Qadar. Hase yeeshee waqtigaas, mas’uuliyiintu ma aysan shaacin in la rumaysan yahay in duuliyeyaasha la qafaashay.
- Advertisement -
Jeneraal Mohammad Bagherzadeh oo ka tirsan ciidamada qalabka sida ee Iiraan ayaa sheegay in ciidamada Qadar ay saddexda nin nolol ku qabteen kadib markii ay dhacday diyaaraddii Su-24 ee ay wateen.
Warqad uu u diray Guddiga Caalamiga ah ee Laanqayrta Cas, wuxuu ku aqoonsaday duuliyeyaasha Javad Salehi, Abdolmajid Dashtian iyo Omran Behraveshian, isagoo sheegay in ciidamada Qadar ay hayeen muddo lix bilood ah.
Wasaaradda arrimaha dibadda ee Qadar si degdeg ah ugama aysan jawaabin codsi faallo ah.
Ciidanka Iiraan ayaa bishii hore sheegay inay soo ceshadeen meydka duuliye Majid Kazemi, kaas oo lagu dilay intii uu socday weerarkii lagu qaaday saldhigga cirka ee Al Udeid ee Qadar horraantii Maarso.
Xaruntan waxaa ku sugan cutubyo hormuud ah oo ka tirsan Taliska Dhexe ee Maraykanka, iyo sidoo kale ciidammada cirka ee taliskaas iyo ciidammada hawlgallada gaarka ah.
Waa saldhigga millatari ee ugu weyn Maraykanka ku leeyahay gobolka.
Wasaaradda gaashaandhigga ee Qadar ayaa horraantii Maarso sheegtay inay soo ridday laba diyaaradood oo nooca Sukhoi Su-24 ah oo Iiraani ah. Weli ma cadda in diyaaradahaas ay ahaayeen isla kuwii lala xiriiriyay duuliyeyaasha la la’yahay, xilli Qadar iyo dalal kale oo gobolka ah ay wajahayeen weerarro aargoosi ah kadib markii weerarradii Maraykanka iyo Israa’iil ay hurinayeen dagaalka.
Waxay ahayd dhacdadii ugu horreysay ee la soo wariyo tan iyo markii colaaddan ay bilaabatay 28kii Febraayo oo dal Khaliiji ahi soo rido diyaarad Iiraani ah.
Hindisayaal diblomaasiyadeed ayaa keenay xabbad-joojin bishii Abriil, taas oo soo afjartay ku dhowaad 40 maalmood oo dagaal ah. Qaab-dhismeed loogu gogol xaarayo wada-hadallo nabadeed ayaa la saxiixay bishii Juun, balse geeddi-socodkii ayaa markii dambe burburay.
Tan iyo markaas, Iiraan iyo Maraykanka ayaa si goos-goos ah isweydaarsanayay rasaas, iyadoo dagaallada ugu culus ay ka socdeen koonfurta Iiraan iyo agagaarka Marinka Hormuz.
Qadar ayaa sidoo kale la beegsaday kadib markii xabbad-joojintu burburtay, iyadoo sheegtay in weerarro lagu qaaday dhulkeeda iyo ugu yaraan hal markab shidaal qaada oo Qatari ah oo marayay marinka.
Weerarradan ayaa yimid xilli Qadar ay xoojisay dadaallada, iyadoo Pakistan ay ka barbar shaqaynaysay kaalinteedii hore ee dhexdhexaadinta, si loo gorgortamo dhammaadka colaadda.
Colaadaha u dhexeeya Maraykanka iyo Iiraan ayaa inta badan degganaa tan iyo dabayaaqadii Luulyo, inkastoo weerarro goos-goos ah oo lagu qaado maraakiibta marinka Hormuz ay sii socdeen.
