Ugu yaraan 144 muhaajiriin ah ayaa dhintay ama weli la la’yahay kaddib masiibooyin isdaba joog ah oo ka dhacay badda xeebaha Mauritania, sida ay sheegtay hay’adda Qaramada Midoobay u qaabilsan qaxootiga (UNHCR). Dad badan oo saarnaa doonyaha, oo ay ku jireen qaxooti, ayaa badda ku xannibnaa 25 maalmood kaddib markii ay ka soo ambabaxeen Gambia, iyaga oo u socda Jasiiradaha Canary ee Spain.
Hawlgalka samatabbixinta ayaa la soo gabagabeeyay 18-kii Luulyo, markaas oo kooxuhu heleen 38 qof oo badbaaday, halka 143 qof loo diiwaangeliyay inay dhinteen ama maqan yihiin. Laba carruur ah oo maalintaas la soo badbaadiyay ayaa dhammaan qoysaskoodii ku waayay badda. UNHCR waxay sheegtay in masiibadani muujisay baahida degdegga ah ee loo qabo in la sameeyo marinno ammaan iyo sharci ah oo lagu tahriibo.
Hay’addu waxay dalalka ugu baaqday inay bixiyaan “fursado dhab ah oo dhaqso badan oo lagu heli karo marinno sharci ah, iyada oo la kordhinayo qoondada dib-u-dejinta, fursadaha shaqo iyo waddooyinka waxbarasho si ay beddel ugu noqdaan safarrada halista ah ee badda.”
