Real Madrid oo barbarro ku bilaabatay horyaalka LaLiga usbuucii hore oo ay Real Sociedad goolal la’aan ku kala baxeen ayaa ku sugan magaalada Seville oo ay kula ciyaarayso Real Betis, waxaanay raadinaysaa guushii ugu horreysay ee xili ciyaareedkan.
Los Blancos oo koobka difaacanaysa ayaa waxa uu Zinedine Zidane sameeyey isbeddel badan marka loo eego ciyaartii hore, waxaana si aan looga baranin uu safkiisa ugu soo bilaabay weeraryahanka ku dhibaataysan Los Blancos ee Luka Jovic oo ka garab ciyaaraya Karim Benzema.
Da’yarka khadka dhexe ee kasoo laabtay amaahda ee Martin Odegaard ayaa kulankii labaad oo xidhiidh ah ugu soo bilowday Real Madrid, waxaana kaydka la dhigay labada ciyaartoy ee reer Brazil ee Vinicius Junior iyo Rodrygo Goez.
Ruug-caddaaga khadka dhexe ee Luka Modric ayaa isaguna kaydka ku jira ciyaartan, waxaase booskiisa dib u helay Casemiro oo ay dhexda wadaagayaan Toni Kroos iyo Fede Valverde.
Difaada ayaanay waxba iska beddelin oo ay iska garab ciyaarayaan Sergio Ramos, Varane, Carvajal iyo Mendy.
Shaxda rasmiga ah ee labada kooxood
Real Betis: Joel; Emerson, Mandi, Bartra, Alex Moreno; Guido, William; Joaquín, Canales, Fekir; Sanabria.
Real Madrid: Courtois; Carvajal, Varane, Ramos, Mendy; Casemiro, Kroos, Valverde, Odegaard; Jovic, Benzema
