Sabti, Luulyo 18, 2026
Muqdisho (AX) — Ceelkii shidaalka ee ugu horreeyay ee Soomaaliya si rasmi ah uga qoddo badda ayaa ku sii dhowaanaya marxalad muhiim ah, iyadoo natiijooyinka sahanka goobta Curad-1 la filayo dhammaadka 2026, xilli ay qodistu sii socoto iyadoo lala kaashanayo shirkadda Batroolka Turkiga (TPAO) ee ay dowladda Türkiye leedahay.
Curad-1, oo ku yaalla qiyaastii 372 kiiloomitir waqooyi-bari ee Muqdisho, ayaa ah mashruucii ugu horreeyay ee rasmi ah ee Soomaaliya shidaal kaga qoddo badda.
Hawlgalka qodistu wuxuu billowday kaddib markii sahanno seismic oo 3D ah laga soo gebagabeeyay saddex aag oo badda ah, kuwaas oo lagu aqoonsaday goobta ceelka sahaminta.
Injineerradu waxay qorsheynayaan inay qodaan ku dhowaad 7,500 oo mitir oo ka hooseeya sagxadda badda, hawshaas oo qaadan karta ilaa 288 maalmood, kana dhigi karta Curad-1 mid ka mid ah ceelasha shidaalka badda ee ugu qotada dheer dunida.
Wasiirka Batroolka iyo Macdanta Daahir Shire Maxamed ayaa sheegay in shaqada goobtu ay socoto, kaddib markii dib loo eegay lana falanqeeyay xogtii sahanka ee hore.
Wuxuu sheegay in mas’uuliyiintu ay hadda diiradda saarayaan tijaabinta ceelkii ugu horreeyay ee Soomaaliya laga qodo badda.
Wasiirka Tamarta Türkiye Alparslan Bayraktar ayaa hawlgalkan ku tilmaamay qodistii ugu horreysay ee Ankara ka fuliso badda qoto dheer meel ka baxsan xuduudaheeda, isaga oo ku sheegay tallaabo taariikhi ah oo ka mid ah barnaamijka sii ballaaranaya ee Türkiye ee sahaminta tamarta caalamiga ah.
Mas’uuliyiinta Soomaaliya waxay mashruucan u arkaan mid suurtagal ah inuu isbeddel weyn ku sameeyo dhaqaalaha dal muddo dheer wajahaya xasillooni-darro iyo dakhli gudaha oo kooban. Waxay sheegeen in haddii la helo shidaal ganacsi ahaan faa’iido leh, ay taasi kordhin karto dakhliga dowladda, soo jiidan karto maalgashadayaal shisheeye, isla markaana Soomaaliya siin karto madax-bannaani maaliyadeed oo weyn.
Hase yeeshee, weli lama shaacin wax natiijooyin ah oo xaqiijinaya jiritaanka kayd shidaal oo ganacsi ahaan faa’iido leh.
Qiimeyn dhammaystiran oo ceelka ah ayaa la filayaa marka qodistu soo gabagabowdo.
