Afar iyo toban carruur ah ayaa ku dhintay markii dab qabsaday waadhka hooyada iyo dhallaanka ee caasimadda Pakistan saaka, sida uu sheegay xafiiska degmada Islamabad.
Dabka ayaa ka kacay dabaqa saddexaad ee Waadhka Caafimaadka Hooyada iyo Ilmaha ee isbitaalka guud ee Pakistan Institute of Medical Sciences (PIMS), ayuu xafiiska degmadu ku sheegay bayaan.
- Advertisement -
“Wadar ahaan 14 carruur ah ayaa ku dhintay dhacdadan,” ayaa lagu yiri bayaanka, iyadoo aan la sheegin da’dooda.
Maamulka ma shaacin waxa sababay dabka.
Wuxuu sheegay in wicitaanka degdegga ahi soo galay wax yar ka hor 7 subaxnimo waqtiga maxalliga ah.
Dababka dhimashada leh ee ka dhaca dhismayaasha waaweyn waa wax ku badan Pakistan, halkaas oo xeerarka badbaadada ee liita, shuruucda dhismaha ee duugoobay iyo fulinta dabacsan si isdaba joog ah loogu eedeeyay inay ka sii daraan masiibooyinka.
Bishii Janaayo, in ka badan 65 qof ayaa ku dhintay dab ka kacay xarun ganacsi oo ku taal magaalada dekedda leh ee Karachi.
Dab kale oo ka kacay suuq ganacsi oo ku yaal Karachi ayaa dilay ugu yaraan 11 qof sannadkii 2023.
Ugu yaraan 16 shaqaale ah ayaa ku dhintay dab ka kacay warshad ku taalla isla magaaladaas sannadkii 2021.
Sannadkii 2012, dab ayaa qabsaday warshad dhar tolid ah oo ku taalla Baldia Town, galbeedka Karachi, waxaana ku dhintay ugu yaraan 250 shaqaale. Dhismaha ma lahayn marin looga baxsado dabka.
