Dab duurjoog ah oo si xawli ah ku socda, isla markaana ay sii huriyeen dabeylo xooggan, ayaa ku qasbay ku dhowaad 42,000 oo qof inay ka baxaan guryahooda magaalada Reno ee gobolka Nevada, halka mas’uuliyiintuna ay amreen in inta badan dugsiyada aaggaasi ay xirnaadaan.
45,000 oo kale oo deggan ayaa loo digay inay isu diyaariyaan barakac suurtagal ah, ayay Duqa Magaalada Reno Hillary Schieve u sheegtay CNN, xilli dabku uu halis gelinayay bulshooyinka galbeedka magaalada.
- Advertisement -
Mas’uuliyiintu waxay sheegeen in dhammaan dugsiyada ku yaalla degmada Washoe, halkaas oo Reno ku taallo, ay xirnaan doonaan marka laga reebo hal dugsi.
Dabka Hawk Fire ayaa billowday Sabtidii, wuxuuna ku fiday 6,091 hektar fiidnimadii shalay, isaga oo muujinaya “dhaqan dab oo aad u daran”, sida ay sheegtay InciWeb, oo ah website-ka dowladda Maraykanka ee la socodka dababka duurjoogta ah.
Lama soo sheegin wax dhimasho ah. Ugu yaraan lix qof ayaa dhaawacmay, oo ay ku jiraan saddex ka mid ah gurmadka koowaad, halka guryo dhowr ah oo ku yaallay buuraha dushooda ay burbureen, sida ay baahiyeen warbaahinta maxalliga ah.
Mas’uuliyiintu waxay dabkan u aqoonsadeen mid “uu bini’aadam sababay” balse ma aysan shaacin waxa kiciyay.
Ku dhowaad 800 oo qof ayaa ka qayb qaadanaya hawlgalka daminta dabka, sida ay sheegtay waax maxalli ah oo dab-demis iyo badbaadin ah, waxaana ku jira kooxo laga soo diray Australia iyo New Zealand.
Sawirro ay adeeggu ku wadaagtay barta X ayaa muujiyay olol iyo tiirar qiiq oo aad u waaweyn oo ka kacaya buuraha ka sarreeya Reno.
Guddoomiyaha Nevada Joe Lombardo ayaa ku dhawaaqay xaalad degdeg ah degmada Washoe.
Amarkiisa ayaa ka digay in Hawk Fire “si degdeg ah u fidayo isla markaana uu halis ku yahay guryo iyo dhismayaal”.
Taliyaha dab-damiska maxalliga ah Richard Edwards ayaa dadka deggan u sheegay inay diyaar u ahaadaan inay si aan dib u dhac lahayn uga baxaan haddii la soo saaro amarro barakac.
“Hawk Fire waa dhacdo aad isu beddel badan noogu ah maadaama ay dabeyluhu wadaan,” ayuu yiri.
“Dababka ay dabeyluhu wadaan waxay si aad u degdeg ah ugu gudbaan deegaannadeenna la deggan yahay,” ayuu raaciyay.
“Haddii laguu sheegay inaad barakacdo, fadlan ha sugin!” ayay Ms Schieve, duqa Reno, ku tiri bayaan lagu daabacay baraha bulshada.
Reno waxay ku taallaa waqooyi-galbeed Nevada, meel u dhow xadka California iyo gobolka dalxiiska caanka ah ee Lake Tahoe ee buuraha Sierra Nevada.
