Xisbiga Hindiya ee isku magacaabay “baranbaro” ayaa joojiyay dibadbaxyadii ay dhallinyaradu hormuudka ka ahayd ee ka socday New Delhi, kadib markii dowladdu ay “aqbashay” dhammaan dalabaadkii uu dhaqdhaqaaqu soo jeediyay, sida uu sheegay afhayeen.
“Dhammaan dalabaadkayagii waa la aqbalay, sidaas darteed waxaan dibadbaxayaasha ka codsanaynaa inay isla markiiba kala dareeraan oo ay si nabad ah guryahooda ugu laabtaan,” ayuu yiri Ashutosh Ranka, afhayeenka xisbiga Cockroach Janta Party (CJP) ee awoodda ka hela baraha bulshada, kadib wadahadallo lala yeeshay wasiirrada dowladda.
Ku dhawaaqistan ayaa timid kadib markii Wasiirka Waxbarashada Hindiya Dharmendra Pradhan uu saaka sheegay inuu iscasiliyay, taasoo guul weyn u ah dibadbaxayaasha ku adkaysanayay inuu xilka ka dego oo uu mas’uuliyadda dusha saarto sir-bixinta waraaqaha imtixaannada.
Pradhan ayaa maanta goor sii horreysay iscasiladdiisa ku shaaciyay X, xilli boolisku sunta dadka ka ilmeysiisa u adeegsanayay kala eryidda dibadbaxayaal dhallinyaro ah oo ku sugnaa New Delhi.
“Waxaan si qoto dheer u ixtiraamayaa himilooyinka, dareenka iyo filashooyinka xaqa ah ee dhallinyarada dalka.”
Markii warku faafay, kumannaan taageerayaasha CJP ah oo isugu soo baxay bartamaha Delhi iyo goobo kale ayaa sacab iyo sawaxan farxadeed la dhacay.
Mas’uuliyiinta federaalka ayaa isku dayay inay xakameeyaan qalalaasaha iyagoo xaddiday gelitaanka internetka isla markaana xiray 18 saldhig oo metro ah, si loo yareeyo dibadbaxa ka socda caasimadda.
Cadhada dadweynaha ayaa cirka isku shareertay tan iyo Isniintii, markaas oo boolisku dhaawacay arday badan intii lagu jiray weerarro budad ah, isla markaana sunta dadka ka ilmeysiisa ku riday si loo joojiyo dibadbaxayaal ku sii siqayay baarlamaanka.
Dibadbaxyadan, oo ay inta badan hormuud ka yihiin dhallinyaro kana dhashay caro laga qaaday waraaqaha su’aalaha ee la faafiyay ka hor imtixaannada gelitaanka ee muhiimka ah, ayaa bannaanka soo dhigay tabashooyin qoto dheer oo ku saabsan shaqo yaraanta, musuqmaasuqa iyo dalabaadka ah in dowladda lala xisaabtamo.
