Ugu yaraan 51 qof ayaa dhintay Khamiistii markii doon ku degtay gobolka Sokoto ee waqooyi-galbeed Nigeria, sida ay sheegeen warar maxalli ah, iyadoo kooxaha gurmadku ay sii wadeen raadinta webiga si loo helo dhibbaneyaal dheeraad ah iyo dad suuragal ah inay badbaadeen.
Shilkan ayaa ka dhacay degmada Goronyo, halkaas oo dadka deggani ay sheegeen in rakaabku u safrayeen dhul-beereed ku yaalla daanta kale. Masiibooyinka doomaha ayaa ku badan wabiyada iyo marinnada biyaha ee si weyn looga isticmaalo Nigeria, waxaana inta badan loo aaneeyaa rar xad-dhaaf ah, dayactir la’aan iyo jebinta xeerarka badbaadada. Tobannaan qof ayaa ku hafata dhacdooyinka noocan ah sannad kasta.
- Advertisement -
“Xaaladdu waa mid aad u xun,” ayuu Ibrahim Musa, oo hore uga tirsanaa golaha deegaanka kana soo jeeda tuulada Gorau, u sheegay AFP.
“Waxaan horay u aasnay 46 mayd, shan kalena hadda ayaa laga soo saaray webiga.”
Ilyasu Adamu, oo ah beeraley maxalli ah, ayaa sheegay in doontu ay “si cad u ahayd mid si xad-dhaaf ah loo raray” ayna degtay qiyaastii hal daqiiqo kadib markii ay dhaqaaqday. Wuxuu sheegay in inta badan dadkii saarnaa ay ahaayeen haween iyo carruur, oo ay ku jireen gabdho la filayay inay dhowaan guursadaan. Adamu wuxuu tirada dhimashada ku sheegay ugu yaraan 48.
Dahir Kure, afhayeen u hadlay Hay’adda Qaran ee Maareynta Masiibooyinka ee gobolka Sokoto, ayaa sheegay in kooxaha gurmadku ay joogeen goobta islamarkaana ay bilaabeen howlgalka.
“Waxaan hadda joognaa goobta shilka doonta, waxaana bilownay howlaha samatabbixinta,” ayuu yiri Kure.
Wuxuu ka gaabsaday inuu bixiyo tiro rasmi ah isla markiiba, isagoo sheegay in mas’uuliyiintu ay weli “ururinayaan macluumaadka lagama maarmaanka ah ee ku saabsan dhacdada”.
Shilkan ugu dambeeyay ayaa daba socda dhowr masiibo oo kale oo dhimasho sababay oo ka dhacay waqooyiga Nigeria. Ugu yaraan shan qof ayaa ku hafatay markii doon rogmatay gobolka Jigawa bishii hore.
Bishii Janaayo, ugu yaraan 26 qof ayaa dhintay kadib markii doon siday beeraley iyo kalluumaysato oo ka safrayay Jigawa kuna socday gobolka Yobe ay rogmatay.
