War kasoo baxay DFS ayaa lagu sheegay in Ciidamada gaarka u tababaran ee DANAB oo howlgal qorsheysan ka fuliyay Gobollada Shabeelaha Hoose & Jubada Dhexe ay dileen saraakiil katirsan Al-Shabaab.
Warka Dowladda ayaa lagu sheegay in howlgalkaan ka dhacay labadaan Gobol ee kala hoostaga DG Koofur Galbeed & Jubbaland uu ahaa mid qorsheysan isla markaana ciidanka fuliyay feejignaan muujiyeen.
Howlgalka Shabeelaha Hoose waxa uu si gaar ah uga dhacay deegaan 44 KM dhanka Waqooyi uga jiheysan Magaalada Wanlaweyn, waxaana fuliyay ururka 4-aad ee guutada 16-aad ee kumandooska danab iyo Ururka 64-aad ee Guutada 7aad Qaybta 60-aad CXDS.
Guulaha Dowladda ka sheegay waxaa kamid ah in ay burburisay goobo Al-Shabaab lacag ku qaadeysay & askarta oo gacanta ku dhigtay Mootooyin ay tilmaameen in Shabaab u adeegsanayeen Miinooyinka.
Dhanka Jubada Dhexe, Dowladda Federaalka waxa ay sheegtay in howlgal ka dhacay lagu dilay sarkaal Al-Shabaab u qaabilsan Warbaahinta oo magaciisa ku sheegtay Cabdullaahi Cismaan Dhega-Cade.
DFS ayaa kordhisay howlgalka ka dhanka ah Al-Shabaab, todobaadyadii lasoo dhaafay ciidamada Dowladda ayaa dhaq-dhaqaaqyo ciidan ka waday Gobollada Shabeelaha Hoose & Shabeelaha Dhexe.
Axadle
