Dalxiisayaal ka dukaameysanaya suuq ku yaal Bodrum, Turkey 15-kii Sebtember, 2017 .
Kooxaha hormoodka ka ah ganacsiga Turkiga ayaa ugu baaqeen Sacuudiga inuu joojiyo dhabar jabinta alaabada ay soo galayaan boqortooyada, iyagoo ka digay in ay taasi dhaawaceyso dhaqaalaha Turkiga iyo kan Sacuudiga.
Bayaan ay soo saareen, hogaamiyayaasha sideeda koox ee ugu waaweyn ee ganacsiga ee Turkiga ayaa sheegay in shirkadaha Sacuudiga ay sheegeen in laga codsaday dalkooda in ay saxiixaan waraaqo ay ku ballanqaadayaan inaysan soo dejin doonin badeecadaha Turkiga.
Sida lagu sheegay bayaanka, sideeda koox ganacsi waxa ay sheegeen in qandaraaslayaasha Turkiga ee badeecadaha gayn jiray Sucuudiga laga reebay qandaraasyada waaweyn ee dalalka kale.
“Arrintaan waa ay ka gudubtay xiriirka dhaqaale ee labada dhinac waxayna dhibaato ku noqotay silsiladaha sahayda ganacsiga adduunka,” ayaa lagu yiri bayaanka oo ay saxiixeen hoggaamiyeyaasha warshadaha, kuwa wax dhoofiya, qandaraasleyda iyo ururada shaqaalaha, sida laga soo xigtay Bloomberg.
Waxay intaas ku dartay: “Hawlgal kasta oo rasmi ah ama aan rasmi ahayn oo lagu joojinayo ganacsiga u dhexeeya labada dal wuxuu cawaaqib xumo ku yeelan doonaa xiriirkeenna ganacsi wuxuuna dhaawici doonaa dhaqaalaha iyo dadka labada dal.”
Dabayaaqadii todobaadkii hore, Amiirka Sacuudiga Abdulrahman Bin Musa’ad ayaa ku baaqay in la qaadaco waxyaabaha laga keeno Turkiga kadib markii Hogaamiyaha Turkiga Recep Tayyip Erdogan uu ku dhawaaqay in ciidamada dalkiisa ee Qatar ay gacan ka geystaan xasilinta amniga dalalka Khaliijka.
Horaantii sanadkan, waxaa la soo wariyay in Sacuudiga uu cadaadis saarayay ganacsiyada maxalliga ah in uusan la ganacsan Turkiga iyo warshadaha si uu u xoojiyo qaadacaada aan rasmiga ahayn. Xiritaanka gawaarida xamuulka qaada ee ka soo qaado Turkiga ayaa sare u qaaday xiisadda labada dal.
Tani waxay timid kadib markii Amiir Faysal Bin Bandar Bin Cabdulcasiis uu diiday inuu cabo kafeega Turkiga ee loo soo bandhigay sanadkii hore. Intii uu Amiir Cabdalla Bin Suldan Al Sacuud ku baaqay in la qaadaco Turkiga iyo wax soo saarkiisa illaa iyo inta “Ankara ay dib u eegis ku sameyneyso siyaasadeeda Boqortooyada”
Dhacdo kale sanadkii la soo dhaafay, Riyaad waxa ay xannibtay daraasiin baabuur xamuul ah oo Turki ah oo siday alaabada dharka iyo kiimikada xadka Boqortooyada. Masuuliyiinta Sucuudiga waxay sidoo kale u badaleen magacii “Boqortooyadii Cusmaaniyiinta” iyaga oo u badalay “qabsashadii Cusmaaniyiinta” waxaana lagu qoray buugaagta iskuulada.
