Saddex qof ayaa dhintay, ugu yaraan 21 kalena way dhaawacmeen kadib markii bam guri lagu farsameeyay oo ay sidday haweeney uu xalay ku qarxay meel u dhow makhaayad heer sare ah oo ku taalla bartamaha Moscow, sida ay masuuliyiintu sheegeen.
Qaraxa ayaa dhacay wax yar ka hor 8-dii fiidnimo ee waqtiga maxalliga ah, meel u dhow makhaayad Talyaani ah oo ku dhex taalla mid ka mid ah toddobada dhisme ee dhaadheer ee xilligii Stalin laga dhisay Moscow, kuna yaalla Fagaaraha Kudrinskaya, sida ay booliisku sheegeen.
Sida uu sheegay Guddiga La-dagaallanka Argagixisada ee Ruushka, haweeney aan la aqoonsan ayaa isku dayday inay gasho makhaayadda, balse waxaa joojiyay waardiye amni, sida ay ku warrantay wakaaladda wararka ee dowladda maamusho ee RIA.
Haweeneyda, waardiyaha iyo macmiil ku sugnaa makhaayadda Talyaaniga ah ee Balzi Rossi ayaa ku dhintay qaraxii xigay, sida uu guddigu sheegay.
RIA ayaa baahisay muuqaallo muujinaya saraakiil ka tirsan ciidamada ammaanka oo si culus u hubaysan kuna sugan goobta, taas oo laga xiray dadweynaha.
Qaraxa ayaa dhacay wax yar ka hor 8-dii fiidnimo ee waqtiga maxalliga ah xalay
Masuuliyiintu ma aysan shaacin magacyada dadka dhintay ama dhaawacmay, mana aysan aqoonsan qof looga shakisan yahay inuu weerarka geystay.
Iyadoo uu sannadkii shanaad galay dagaalka ballaaran ee Ruushku kula jiro Ukraine, hay’adda amniga ee FSB ayaa horraantii sannadkan sheegtay inay xoojin doonto ilaalinta saraakiisha sare ee milatariga, kadib dilal iyo isku-dayo dil oo xiriir ah oo ay ku eedeysay Kyiv.
Wargeyska Kommersant, oo soo xiganaya ilo u gaar ah, ayaa sheegay in walxaha qarxa loogu talagalay in lagu dhaawaco ama lagu dilo dadkii wax ka cunayay ee ku sugnaa barxadda bannaanka ee makhaayadda xilliga xagaaga.
Bogga internetka ee makhaayadda ayaa sheegay in goobtu xalay u xirnayd munaasabad gaar loo leeyahay.
Daawo: Wixii ka dambeeyay qaraxii bam ee ka dhacay meel u dhow makhaayad ku taalla Moscow
