Daanyeer muddo laba toddobaad ah argagax gelinayay dadka deggan Jasiiradda Sumatra ee Indonesia ayaa la qabtay, taasoo nafis u noqotay magaalo ay weerarradiisu ku qasbeen tobannaan dugsi inay xirmaan.
Daanyeerka qaangaarka ah ee nooca makaakada dabada dheer ayaa 18 qof ku dhaawacay Tembilahan, isagoo qaniinay oo xagxagtay dhibbanayaasha, kuwaas oo badankood la weeraray iyagoo keligood ah. Dhibbanayaasha waxaa ka mid ahaa carruur iyo dad waayeel ah.
“Ilaa maanta, waxaa dhacay 19 weerar oo ay ku dhaawacmeen 18 qof. Hal dhibbane ayaa laba jeer la weeraray,” ayuu madaxa adeegga dab-damiska iyo samatabbixinta Tembilahan, Junaidy Ismail, u sheegay AFP.
Dabatooyinku waxay daanyeerka qabteen xalay goor dambe, iyagoo adeegsanaya qafis la dhigay magaalada. Adeegga samatabbixinta ayaa baahiyay muuqaal muujinaya xayawaanka oo nool, isla markaana u muuqda mid walaacsan isagoo biraha qafiska gadaashooda ku jira.
Sarkaalka magaalada Ari Syuria ayaa dadka deegaanka ugu baaqay inay feejignaadaan, isagoo ka digay in makaakada la qabtay laga yaabo inuusan keligiis weerarrada geysanayn.
“Walaaca jira ayaa ah inay jiri karaan daanyeerro kale oo dadka weeraraya,” ayuu Ari ku yiri qoraal uu soo dhigay Instagram.
Afartan dugsi ayaa maanta weli xirnaa, halka boqollaal arday oo ku nool Tembilahan lagu amray inay saddex maalmood casharrada ku qaataan internetka.
Dowladda hoose ayaa sheegtay in dugsiyada dib loo furi doono Isniinta soo socota haddii mas’uuliyiintu go’aamiyaan in xaaladuhu ammaan yihiin.
Mas’uuliyiintu waxay daanyeerka u wareejiyeen Pekanbaru, caasimadda gobolka Riau ee Sumatra, halkaas oo hay’adda ilaalinta dabeecaddu ay ka qaadi doonto baaritaanno dhiig, isla markaana la socon doonto hab-dhaqankiisa.
“Waxaan dooneynaa inaan xaqiijinno in daanyeerku sido wax cudurro ah iyo in kale,” ayuu sarkaalka hay’adda Ujang Holisudin u sheegay AFP.
Iskahorimaadyada dadka iyo duurjoogta ayaa ku baahsan jasiiradaha tirada badan ee Indonesia ee Koonfur-bari Aasiya. Ballaarinta beeraha saliidda timirta ayaa xaalufisay kaymaha roobka, waxayna yaraysay deegaannada dabiiciga ah ee xayawaanka ay ka mid yihiin daanyeerrada, maroodiyada iyo shabeellada, taasoo kordhisay suurtagalnimada inay dadka la kulmaan.
