Jamaahiirta kooxda Liverpool ayaa ah kuwo aad ugu riyaaqsan bandhigyada daafaca dhexe ee kooxdooda dhawaan galka ku ah ee Ibrahima Konate kaas oo markale qaab ciyaareed sarre ku muujiyay guushii ay shalay ka gaadheen Mainz ee 1-0 ka ahayd.
Iyadoo labada daafac dhexe ee Liverpool ee Joe Gomez iyo Virgil Van Dijk loo badinayo inay seegaan kulamada ugu horreeya ee xilli ciyaareedka cusub ayuu Konate ilaa haatan soo muujiyay sabab isaga daafaca dhexe loogu aamini karo.
Konate ayaa ilaa hadda labadii kulan ee Liverpool ee ay ka ciyaartay kulamada isku diyaarinta xilli ciyaareedka kasoo wada dhalaalay.
Kulanka shalay ee ay guusha ka gaadheen Mainz ayaa ahaa mid uu jamaahiirta Reds kaga kasbaday amaan iyaga oo la bar-bardhigay Van Dijk.
Taageeraha koowaad ayaa yidhi isaga oo Konate ka dhex arka Van Dijk “Konate waa sida Van Dijk oo kale, uma eeka mid xoog u ordaya, waa mid aayar dhaqaaqaya dhul badan ayuuna ku daboolayaa wakhti sidaa u yar”
“Miyay aad u badantahay in la yidhaahdo Konate waxa uu kulanka u akhrinayaa sida Van Dijk” ayuu yidhi taageere kale.
“Konate si adag ayuu kubadda u taakalayaa si lamid ah Van Dijk taasina waa mid xiiso leh” ayuu taageere saddexaad yidhi.
Taageere kale oo amaanaya Ibrahima ayaa isaguna yidhi “Konate waxa uu Van Dijk kala mid yahay astaanta ah “Sideed iskugu daydaa eed ugu dhacdaa inaad i dhaafto”
“VVD 2.0” ayuu si fudud u yidhi mucaashaq kale oo Liverpool ah oo Konate u arkayay Van Dijk kale.
