Madaxweynihii hore ee Soomaaliya Cali Mahdi Maxamed ayaa ku geeriyooday isbitaal ku yaal magaalada Nairobi ee caasimada dalka Kenya, halkaas oo uu ku xanuunsanayay COVID-19.
Madaxweynayaashii hore ee Soomaaliya ayaa ka tacsiyeeyay geerida
Haddaba waa kuma Cali Mahdi?
Cali Mahdi Maxamed wuxuu ahaa madaxweynihii afraad ee Soomaaliya. United Somali Congress, oo la wareegtay gacan ku haynta magaalada Muqdisho iyo qaybo kale oo dalka ka mid ah, ayaa u doortay madaxweyne bishii January 28, 1991.
Magacaabista Cali Mahdi waxaa markiiba ka horyimid mid ka mid ah hogaamiyeyaashii USC Jeneraal Maxamed Faarax Caydiid. Jabhadihii inqilaabay Max’ed Siyaad Barre ayaa mar kale ku kulmay magaalada Jabuuti bishii Luulyo 1991, waxayna mar labaad u doorteen Cali Mahdi Hogaamiyaha Soomaaliya.
In kasta oo ay ka soo horjeesteen qaybo ka mid ah waddanka, haddana waxaa lagu beddelay Hogaamiye Cabdiqaasim Salaad Xasan, oo lagu doortay Jabuuti sanadkii 2000.
Cali Mahdi wuxuu ku dhashay Caddow-Uul, oo u dhow degmada Cadale ee gobolka Shabeellada Dhexe sanadkii 1935, waxbarashadiisii hoose wuxuu ku qaatay magaalada Muqdisho.
1969-kii Cali Mahdi wuxuu ka mid noqday baarlamaankii rayidka ka hor inqilaabkii militariga.
Toddobaatanaadkii Cali Mahdi wuxuu u weecday dhanka ganacsiga wuuna ku guuleystay. Sidoo kale wuxuu ka soo shaqeeyay Wasaaradda Caafimaadka Soomaaliya, gaar ahaan Mashruuca Duumada.
Madaxweynihii hore Cali Mahdi ayaa sidoo kale sanadihii la soo dhaafay ku howlanaa dib u heshiisiinta Behala iyo howlaha samafalka.
