Hogaamiyaha maamulka Jubbaland Axmed Maxamed Islaam (Madoobe) iyo wafdi uu hogaaminayo ayaa maanta soo gaaray magaalada Muqdisho si ay uga qeyb galaan shir la filayo in todobaadkan lagu qabto magaalada Muqdisho.
Waxaa ku soo dhoweeyay garoonka diyaaradaha Aadan Cadde mas’uuliyiin ka tirsan dowladda iyo xubno ka tirsan midowga musharixiinta.
Wafdiga uu hogaaminayo madaxweynaha Jubbaland waxaa ka sii horeeyay ilaalada madaxweynaha iyagoo ka dagi doona aaga Muqdisho.
In kasta oo xerada Xalane saacado ka hor la duqeeyay, hadana Axmed Madoobe wuxuu yimid sidii la filayay waxaana la filayaa inuu kamid noqdo saxiixayaasha heshiiska doorashada.
Dowladda Federaalka, dowladaha xubnaha ka ah iyo gobolka Banaadir ayaa ku shiri doona teendhada Afisyooni halkaas oo ay ka dhacday doorashadii 8-da Febraayo ee Hogaamiyaha xilka ka degaya Maxamed Cabdullaahi Farmaajo.
Heshiis dhameystiran ayaa lafilayaa in halkaas lagu gaaro si horey loogu sii wado doorashada la isku raacsan yahay, waxayna la jaan qaadi doontaa heshiiskii doorashada ee la gaaray Sebtember 17, 2020 iyo isfahamka isfaham ee ay gaareen guddiyadii ka socday magaalada Baydhabo bartamihii bishii Febraayo 2021.
