Muqdisho (Axadle) – Ciidamada daacada u ah Musharax Madaxweyne C / raxmaan C / shakuur iyo xoogaga kale ee ka soo horjeeda mudo kordhinta oo ay kala hogaaminayaan Saadaq John iyo Yusuf Indhacadde ayaa ka guuray agagaarka Madaxtooyadii hore ee Cabdiqaasim oo ay ku sugnaayeen habeenadii la soo dhaafay.
Ciidamada ayaa la sheegay inay u dhaqaaqeen dhanka degmada Siigaale ee degmada Hodan, halkaasoo iyaga iyo inta la socotaba ay ka samaysteen saldhig cusub.
Jen. Sadiiq Joon iyo Yuusuf Indhacadde ayaa la sheegay inay ku tilmaameen tallaabadani inay tahay istiraatiijiyad milateri oo looga guurayo saldhiggoodii hore, waxayna hadda u muuqdaan inay isku ballaariyeen goobo cusub ayna ku soo dhowaanayaan xarunta madaxtooyada
Waxay sidoo kale ku biireen xoogaggii hore ee Barmuudo, Dambka iyo qaybo ka mid ah degmooyinka Howlwadaag, oo iyaguna mucaarad ku ah dawladda kuna dhow Raiisul wasaarihii hore Xasan Cali Kheyre.
Tani waxay ka dhigan tahay in wadada inta badan xaafadaha hoos yimaada Maka Al-Mukarama ee Howl-Wadaag iyo Hodan ay gacanta ku hayaan xoogaga ka soo horjeeda dowlada.
Dhanka kale ciidamada amaanka dowlada ayaa bilaabay inay furaan wadada udhaxeysa isgoysyada KM4 iyo Tarabuunka, halkaasoo xoogaga taageersan mucaaradka ee ilaalinaya musharixiinta u taagan xilka madaxweynaha ee kala ah C / raxmaan C / shakuur, Saadaq Joon iyo Yuusuf Indhacadde ay horey u dhigteen dhufeysyo.
Wararkii ugu dambeeyay ee naga soo gaaraya degmooyinka Hodan iyo Howlwadaag ee gobolka Sh / hoose ayaa sheegaya in halkaasi uu ka dhacay iska hor imaad xoogan.
