Toni Kroos iyo Cristiano Ronaldo ayaa isku gooni noqday iyagoo dhex-taagan garoonka Allianz Stadium ee magaalada Muncih markii ay soo dhamaatay ciyaartii Jarmalku 4-2 ku karbaashay Portugal, waxaanay isweydaarsadeen hadallo kooban iyadoo uu waliba xiddiga reer Portugal qarinayey afkiisa.
Labadan ciyaartoy ayaa hore ugu soo wada ciyaaray Real Madrid oo ay kula guuleysteen saddex Champions League, LaLiga iyo koobab kale oo badan.
Toni Kroos ayaa wax laga weydiiyey wixii ay isu sheegeen Cristiano Ronaldo iyo wixii uu isagu shaqsiyan ku yidhi maadaama uu ahaa qofka hadalka bilaabay, waxaanu yidhi: “Afar sannadood ayaan kasoo garab ciyaaray. Waxa aanu deris ku ahayn qolka lebbiska dabacanna waan ku faraxsanaa inaan mar kale arko.
“Waxaanu si kooban uga hadlnay ciyaarta iyo kulamada kale ee soo socda. Waxa aan u rajeeyey nasiib wanaagsan. Waxa kale oo aan weydiiyey sida ku yahay horyaalka Talyaaniga.”
Waxa kale oo uu Kroos amaanay difaaca reer Portugal ee Pepe oo ay saddex sannadood u wada ciyaareen Real Madrid, waxaanu yidhi: “Pepe waa wiil heersare ah oo mararka qaarkood u muuqda mid xun garoonka dhexdiisa.
“Uma muuqdo inuu yahay qof aad u wanaagsan, laakiin gebi ahaanba aad ayuu u fiican yahay bannaanka garoonka.
“Waa sida Cristiano Ronaldo oo kale.”
