Garabka weerar ee kooxda Manchester City ee Riyad Mahrez ayaa biyo qabaw ku shubay wararka la xidhiidhinaya bixitaan gaar ahaan kooxda kale ee Premier League ee Arsenal oo magaciisa lagu garab xusayay dhawaanahan.
Riyad ayaa ah mid aqoon u leh tababaraha Arsenal ee Mikel Arteta markii uu macalinka Gunners ahaa ku xigeenka Pep Guardiola ee Sky Blues.
Inuu ku qanciyo Mahrez inuu kula soo biiro Arsenal ayaa shaqo adag uga baahan doonta Arteta xilli ay jiraan warar dhinacooda xusaya in Guardiola uu doonayo inuu iska iibiyo 30 sano jirkaas.
Laakiin xiddiga Algerian-ka ah ayaa u sheegay DZ Sport kaddib markii uu qarankiisa metelay una dhaliyay goolkii ay Mali kaga adkaadeen Axadii inuusan meelna uga socon Man City oo uu farxad ku dareemayo.
Riyad ayaa ugu horreynba wararka mustaqbalkiisa ka hadlaya kaga jawaabay “Ma jiraan wax ku saabsan mustaqbalkayga”
“Waan ku wanaagsanahay Manchester, waan joogi doonaa haddii Alle yidhaa, wali ma garanayo waxa ay xaaladaydu noqon doonto laakiin waan ku faraxsanahay City, iyagu waa koox aan doonayo inaan joogo”
“Dadku waxay igala hadleen inaan waayahayga ciyaareed ku dhammaysto Marseille laakiin taasi maaha wax aan ka fikiro, waxaan doonayaa inaan waayahayga ciyaareed ku dhammaysto England, inaan ku dhammaysto City, naftayda uma saadaalinayo Marseille”
