Mesut Ozil ayaa usii sheegay ciyaartoyda Arsenal waqtiga ay soo taabanayaan shabaqa Manchester United ka hor intii aanay kooxdiisu guusha ka gaadhin Old Trafford.
Laacibkan reer Germany oo aan ku jirin liiska ciyaartoyda Arsenal ee xili ciyaareedkan oo uu tababare Mikel Arteta ka reebay ayaa ciyaarta kala socday telefishanka oo uu ka samaynayay tabin iyo saadaal intaba.
Waqtigii nasashada ayuu Mestu Ozil bartiisa Twitterka kusoo jeediyey dadka ku xidhan kaddib markii uu kooxdiisa usii saadaaliyey xilliga ay goolka soo dhalinayaan, isla markaana uu qiimayn ku sameeyey bandhiggooda.
“Qaybta hore waad baad u fiicnaydeen – sii wada cadaadiska Gunners. Goolashana aynu helno qaybta dambe.” Ayuu Ozil kusoo qoray bartiisa Twitterka farriin qabsatay baraha bulshada oo ay jamaahiirta Arsenal u arkeen inay ahayd mid dhiirigelin weyn u noqotay ciyaartoygooda.
Markii ay goolka rikoodhaha ah dhalisay Arsenal, ayuu mar kale Mesut Ozil kusoo laabtay bartiisa Twitterka, waxaanu il-bidhiqsiyo gudahood kusoo qoray: “Yeeeeees!
“Ugu dambayn… Si fiican ayaad ugu qalmabaysay – Aubaaaaaa – waad kusoo laabatay xaashida gool-dhalinta.”
Dhamaadka ciyaarta markii uu garsooruhu afuufay siidhiga dhamaadka ayuu mar kale Ozil qoraal ku yidhi: “Guul aasaasi ah, Gunners.”
Arsenal ayay guushani u ahayd markii ugu horreysay ee tan iyo January 2016 ay iyadoo marti ah ka adkaato mid ka mid ah lixda kooxood ee waaweyn, xilligaas oo ay 2-0 kaga soo badisay Manchester City oo ay Emirates ugu tagtay kulan ka tirsanaa Premier League.
