Antoine Griezmann ayaa markii saddexaad aabbo noqday subaxnimadii khamiistii maanta, iyadoo uu u dhashay ilmihiisii saddexaad, waxaana uu ugu magac daray difaaca Barcelona ee Alba.
Xaaska Antoine Griezmann oo lagu magacaabo Erika Choperena ayaa umushay saaka, waxaana qoraal ay soo dhigtay barteeda bulshada ee Instagram ay ku muujisay farxaddeeda kaddib ilmaha kusoo kordhay qoyska, waxaanay carruurteeda oo dhan u dirtay hambalyo.
Laba carruur ah oo hore ayey Antoine Griezmann iyo Erika Choperena isku dhaleen, waxaanu Alba noqonayaa ilmihii saddexaad.
Canugooda ugu weyn oo lagu magacaabo Mia ayaa dhashay sannadkii 2016kii, waxaana ku xigay Amaro oo saddex sannadood kaddib dunida yimid, halka maanta ay farxad kusoo dhoweeyeen ilamahooda saddexaad oo ah Alba.
Arrinta layaabka leh ayaa waxay tahay in dhamaan saddexdan carruurta ah ay dhasheen taariikh isku mid ah, waana April 8.
Mia oo ugu weyn ayaa April 8, 2016 dunida yimid, waxaana xigay Amaro April 8, 2019kii dhashay, halka Alba aanu ka leexanin isla maalintaas oo uu dhashay April 8, 2021.
Erika Choperena ayaa qoraalkeeda ay ku daabacday barteeda bulshada farxadda dhalashada kula wadaagtay labadeeda carruurta ah ee waaweyn iyo midka dambe oo ay isagana sii raacisay, waxaanay ku tidhi: “Maanta waxay calaamad u tahay labada iyo shan sannadood oo ah tan iyo markii aad adduunyada timaaddeen. Waxaad beddesheen dunideena, waxaanad naga dhigeen kuwo koray, wax bartay oo sidii hore ka fiican.”
Dhinaca kale, Antoine Greizmann ayaan ka qayb-gelin tababarkii Barcelona ee Khamiistii maanta, waxaanu wehel u ahaa xaaskiisa. Laakiin wuxuu tababarka kusoo laaban doonaa Jimcaha si uu iskugu diyaariyo kulanka El Clasico ee Real Madrid ay u tegayaan Sabtida.
