Guuldarradii xalay kasoo gaadhay Barcelona oo Camp Nou joogta dhigeeda Juventus ee 3-0 ka ahayd ayaa aad uga cadhaysiiyay tababaraha iyo daafaca bidix ee kooxdaas ee Ronald Koeman iyo Jordi Alba oo af-xumeeyay garsooraha kulanka.
Koeman iyo Alba ayaa labaduba soo bandhigay dareenkooda cadho ee ay ka qabaan garsoore Tobias Stieler iyo go’aamo uu gaadhay intii kulankaasi socday.
“Aad ayaad u xuntahay, waxaad tahay baastar (Bastard)” ayaa la maqlayay Jordi Alba oo ku qaylinaya daqiiqadii 27-aad ee kulanka kaddib markii uu kaadh jaale ah qaatay.
Intaas kaddib Jordi Alba oo qaladkiisa qaatay ayaa garsooraha ku raali-geliyay tunel-ka garoonka waxaana la fahamsan yahay in Stieler aqbalay raaligelinta Alba.
Dhinaca kale Ronald Koeman ayaan dib uga gaban garsooraha ree Germany isaga oo la murmay wakhtigii garoonka laga baxayay.
Tababarihii hore ee xulka qaranka Netherlands ayaa la maqlay isaga oo ku leh Stieler “Saaxiibo wanaagsan ayaad ku leedahay Talyaaniga”
Waraysigii kulanka kaddib ayuu Koeman sheegay in rigoorihii koowaad ee Ronaldo lagu galay uu ahaa qalad sidoo kalena uu rigoore ahaa midkii Lionel Messi lagu galay xerada ganaaxa ee Juventus dhexdeeda.
