Xidhiidhka kubadda cagta Yurub ee UEFA ayaa sameeyay isku aadka tartanka labaad ee ugu xiisaha badan heer kooxeed qaarada Yurub ee Europe League iyadoo ay kasoo baxeen kulamo xiisahooda wataa.
Aan ku bilawnee kooxda Manchester United oo xalay kasoo baxday dhigeeda AC Milan ayaa ku aaday kooxda ree Spain ee mucjisada ka dhigaysa xilli ciyaareedkan tartanka ee Granada.
Kulanka xiisaha badan ayaa dhex mari doona kooxaha Ajax iyo AS Roma iyadoo ciyaartaas lagu sifayn karo mida ugu adag ee kasoo baxday wareegan siddeed dhammaadka.
Arsenal oo iyaduna xalay kasoo gudubtay Olympiacos ayaa markan ku aaday kooxda Slavia Prague halka ay isku beegmeen kooxaha Villarreal iyo Dinamo Zagreb oo iyadu xalay wacdarro ku dhigtay Tottenham.
Dhinaca kulamada afar dhammaadka, kooxda kasoo baxda kulanka Granada vs Man United ayaa ku beegmi doonta mida kasoo baxda Ajax vs AS Roma halka kooxda kasoo baxda kulanka Arsenal vs Slavia Prague ay ku aadi doonto mida kasoo najaxda Dinamo Zagreb iyo Vilarreal.
