Xiddigii hore ee kooxda Barcelona ahna kabtanka xulka Argentina ee Lionel Messi ayaa xalay Final-kii shanaad ee waayihiisa ciyaareed dalkiisa la gaadhay isaga oo ka xaadiriyay kulanka kama dambaysta ah ee Copa America.
Argentina ayaa Axada Final-ka Copa America gegida caanka ah ee Maracana ee magaalada Rio kula ciyaaraysa Brazil oo ah martigeliyayaasha koobka.
Messi ayaa filanaya inuu ugu dambayn soo af-meero taariikhda madaw ee loogu maadsado ee ah inuusan marnaba dalkiisa kula guuleysan koob caalami ah.
Haddaba, ciyaarta afar dhammaadka ee ay xalay Final-ka ku gaadheen ayaa ahayd mid adag oo dhex martay dhigooda Colombia, kulanka ayaa 1-1 la isku mari waayay oo u baahday in rigoorayaal lagu kala baxo.
Goolhayaha Aston Villa ee Emi Martinez ayaa noqday geesiga Argentina isaga oo saddexley rigoorayaal ah badbaadiyay si uu dalkiisa u geeyo kulanka kama dambaysta ah.
Mid kamida dhacdooyinka ugu hadal haynta badan ee ciyaartaas ayaa ah falcelintii Lionel Messi ee markii uu rigoore khasaariyay daafaca Everton iyo xulka Colombia ee Yerry Mina oo ay hore Barcelona uga soo wada tirsanaayeen.
Messi ayay kaameradu qabatay isaga oo ku qaylinaya erayada ah “Imika Jaaz, Imika Jaaz” markii uu rigooraha khasaariyay Mina isaga oo ugu maadsanaya in Mina uu jaasay ciyaartan tii ka horreysay markii uu rigoore ka dhaliyay xulka Uruguay.
Messi oo dareenkiisu aad u sarreeyay ayaa loo qiyaasan karaa inuu ka cadhaysnaa qaabkii ay ula dhaqmeen xiddigaha Colombia intii kulanku socday maadaama oo 6 kaadh jaale oo ay ciyaarta oo dhan qaateen ay isaga kaligii ku qaateen.
Halkan Ka Daawo Muuqaalka
MESSI SCREAMING ‘DANCE NOW’ AFTER YERI MINA’s MISS ????pic.twitter.com/P8120ApG7J
— Messi Worldwide (@Messi_Worldwide) July 7, 2021
