Cristiano Ronaldo ayaa go’aan cad ka qaatay mustaqbalkiisa xilli lala xiriirinayo inuu ka tagayo Juventus kuna laabanayo Manchester United. Ronaldo ayaa si joogta ah loola xiriirinayaa inuu ku laabanayo Old Trafford xagaaga danbe.
Ronaldo ayaa weli labo sannadood ay uga harsan tahay qandaraaskiisa Juventus laakiin waxaa lala xiriirinayaa inuu baxayo.
Xiddiga reer Portugal oo 35 sanno jir ah ayaa joogay Juventus tan iyo sannadkii 2018 isagoo kula guuleystay labo koob oo horyaalka Serie A ah.
Wuxuu dhaliyay 71 gool 94 kulan oo tartamada oo dhan ah, wuxuuna u muuqday mid waayihiisa ciyaareed ku dhameysanaya magaalada Turin.
Si kastaba waxaan dhawaan soo baxay warar xan ah oo sheegaya inuu doonayo inuu isaga tago Juventus xagaaga danbe.
Waxaa soo baxayay warar sheegaya in loo bandhigay Paris Saint-Germain iyadoo lagu soo bedelanayo 28 jirka Neymar.
Laakiin inuu ku laabanayo United ayaa sidoo kale la soo hadal qaaday iyadoo xiddiga reer Portugal la sheegay inuu xiiseynayo ku laabashada Old Trafford.
Si kastaba, warar ka imaanaya Spain ayaa biyo qabow ku shubay wararkaas.
Wargeyska AS ayaa sheegaya in Ronaldo uu doonayo inuu waayihiisa ciyaareed ku dhameysto Juventus mana bixi doono inta ka harsan qandaraaskiisa.
Wuxuu dareensan yahay in albaabkiisa Old Trafford uu xirmay, mana doonayo inuu dib u laabto.
Ronaldo ayaa ka tagay United kuna biiray Real Madrid sannadkii 2008, waxaana lala xiriirinayay inuu Old Trafford ku laabanayo tan iyo markaas.
Laakiin waxaa lagu waramayaa inuu go’aansaday inuusan dib ugu laabanin United isagoo dareensan in cutubkaas ka mid ah waayihiisa ciyaareed inuu soo xirmay.
Ronaldo ayaa weli jaceyl weyn u haya United sida ay sheegtay AS laakiin adoonayo inuu mar kale u dheelo Red Devils.
Warbixinta wargeyska AS ayaa sidoo kale meesha looga saaray wararka la xiriirinaya PSG.
