Tababaraha kooxda Marseille ee Andre Villas-Boas ayaa amaanay kooxda uu caawa kahor tagayo ee Manchester City iyo tababaraheeda Pep Guardiola isaga oo ku sifeeyay dhigiisa ree Spain mid Champions League khabiir ku ah.
Kooxda ka socota horyaalka Ligue 1 ayaa ku qasban inay hesho natiijo ka wanaagsan mida ay Olympiacos caawa helayso si ay booska saddexaad ugu dhammaysato oo ay UEFA Europe League uga qayb ahaato.
City ayaa la filayaa inay shax bedel xoogan samayn doonto kaddib markii ay xilli horeba wareega 16-ka usoo baxday isla markaana ay jirto xaqiiqada ah inay toddobaadka dambe ciyaarayaan kulanka Manchester Derby.
Andre Villas-Boas oo ka hadlayay shirkiisa jaraa’id ee kulanka ka horreeya ayaa ku dooday in xiddigaha keydka City ah ee kulankan kahor imanayaa ay awood u leeyihiin inay ku guuleystaan Champions League.
Villas-Boas ayaa yidhi “Inaanu soo baxnaa gacmahayaga kuma jirto, waxaan ku rajo weynahay in Porto ay wax wanaagsan noo samayn doonto laakiin waynu ognahay inay wax adag noqon doonto marka aanu Manchester City kahor tagayno, waxay haystaan dookhyo aad u badan, iyo dookhyo badan oo heer sarre ah sidoo kale”
“Anagu kuma tiirsanaan karno Porto laakiin waa inaanu qaabkayaga ugu fiican ku jirno si aanu u helno natiijo wanaagsan sababtoo ah kooxda labaad ee City ayaa awood u leh inay Champions League ku guuleysato, sidaan filayo”
“Champions League dhexdiisa anigu khabiir ma ihi, Pep ayaa ah khabiirka, isagu laba jeer ayuu kusoo guuleystay ka tababare ahaan”
Maaha wax sir iyo qarsoodi ah in Pep Guardiola uu doonayo inuu CL keeno Etihad kaddib markii uu ku fashilmay inuu wareega 8-da dhaafo inta uu joogay kooxdaas.
