Daafaca dhexe ee xulka qaranka Germany ee Mats Hummels ayaa shaaca ka qaaday sheekada wiilkiisa yar ee saddex sano jirka ah kaddib markii uu gool si qaldan iskaga dhaliyay kulankii ay guuldarrada 1-0 ka ah kala kulmeen France.
Hummels ayaa sheegay inuu wiilkiisu u dabaaldegay goolka uu iska dhaliyay aabihii walow uu ahaa midkii kali ahaa ee guuldarrada ku sababay Germany.
Hummels ayaa sheegay in wiilkiisu uusan ahayn mid wali kala garanaya sharciga goolasha isla markaana uu moodayo wax wanaagsan markasta oo ay kubaddu goolka gasho xataa haddii la iska dhaliyo.
Mats Hummels oo waraysi siinayay wargeyska Bild ayaa ugu horreynba hadalkiisa ku furtay “Nasiib wanaag isagu wali ma garanayo waxa uu gool la iska dhaliyaa yahay”
“Waxa uu filayaa in markasta oo kubaddu shabaqa gashaa ay sax tahay, waxa la ii sheegay inuu dabaaldegayay, hubaal waa inaan baro midaas”
Mats ayaa noqday ciyaaryahankii saddexaad ee durtaba wareegii hore ee Group-yada Euro 2020 iska dhaliya gool isaga oo ku biiray liiska Wojciech Szczesny iyo Merih Demiral.
