Arsenal ayaa ka soo kabsatay seddex gool oo looga hormaray islamarkaana barbaro 3-3 ah ku qabatay kooxda West Ham oo marti loogu ahaan London Stadium, ciyaartii ugu xiisaha badneyd Premier League ee sannadkan 2021.
West Ham ayaa 3-0 ku hogaamineysay ciyaarta daqiiqadii 32aad ka dib goolal ay u kala dhaliyeen Jesse Lingard, Jarrod Bowen iyo Tomas Soucek laakiin Gunners ayaa soo laabasho cajiib ah sameysay ka dib labo gool ay iska dhaliyeen West Ham iyo goolka barbaraha uu u saxiixay Alexandre Lacazette.
- Advertisement -
Waa markii labaad taariikhda Premier League ee ay Arsenal barbareyso seddex gool oo looga hormaray. Waxay natiijadaan Arsenal soo gelisay kaalinta 9aad iyagoo leh 42 dhibcood halka West Ham ay weli baaqi ku tahay kaalinta 5aad iyagoo leh 49 dhibcood islamarkaana labo dhibcood ka danbeeya kooxda kaalinta afaraad ee Chelsea.
Ciyaartii maanta ka dhacday bariga magaalada London waxay aheyd ciyaar xiiso iyo xamaasad badan oo waali ah iyadoo madadaalo fiican u aheyd taageerayaashii daawaday.
Arsenal ayaa la gumaaday 30kii daqiiqo ee ugu horeysay ciyaarta iyadoo West Ham ay seddex gool oo deg deg ah dhalisay. Xiddiga amaahda uga soo maqan Manchester United Jesse Lingard ayaa goolasha bilaabay daqiiqadii 16aad markii kubad gantaal ah oo qurux badan uu shabaqa ku hubsaday ka dib baas uu ka helay Michael Antonio.
98 ilbiriqsi ka dib ciyaarta waxay noqotay 2-0 oo ay West Ham ku hogaamineysay ka dib markii ciyaartoyda Arsenal ay muujiyeen khibrad la’aan iyagoo iska istaagay xilli qalad loo dhigay West Ham, taasoo keentay in Jesse Lingard uu baas ku boobsiiyo isagoo u dhigay Jarrod Bowen kaasoo darbo ka hoos bixiyay goolhaye Bernd Leno oo ay aheyd inuu badbaadiyo.
Daqiiqadii 32aad ee ciyaarta West Ham ayaa dhalisay goolkeedii 3aad markii kubad madax aheyd oo ka timid Michael Antonio uu shabaqa ku sii taabtay Tomas Soucek.
Markii Arsenal seddexda gool laga dhaliyay ayay hurdada ka kaceen iyagoo bilaabay inay jaanta isla helaan oo ay ciyaaraan kubad weerar ah.
Gunners ayaa gool soo ceshatay daqiiqadii 38aad markii kubad uu soo dhigay Chambers uu shabaqa ku laabay Alexander Lacazette laakiin waxay kubada ku dhacday Soucek oo loo qoray inuu iska dhaliyay. Qeybtii hore oo xamaasad badneyd ayaa ku dhamaatay 3-1 oo ay West Ham hogaanka ku heysay.
Qeybtii labaad Arsenal ayaa halkeeda ka sii waday weerarka iyadoo Issa Diop uu xariiqda goosha ka soo bixiyay kubad goolloo fishay laakiin Gunners ayaa ciyaarta si rasmi ah ugu soo laabatay daqiiqadii 61aad markii Criag Dawson shabaqa iska geliyay kubad uu soo karoosay Chambers taasoo ciyaarta ka dhigtay 3-2.
West Ham ayaa ku dhawaatay inay ciyaarta disho markii uu Michael Antonio garaacay birta oo faaruq ah, laakiin Arsenal ayaa soo laabashadeeda dhameystirtay daqiiqadii 81aad ee ciyaarta markii uu Lacazette madax ku dhaliyay karoos uu soo qaaday Nicholas Pepe.
Labada goolhaye ayaa badbaadino fantastik ah sameeyay shantii daqiiqo ee ugu danbeysay ciyaarta. Iyadoo ugu danbeyn ay labada kooxood ku kala baxeen barbaro 3-3 ah.
