Timo Werner ayaa loo arkaa mid ka mid ah xiddigaha ugu orodka badan Premier League laakiin Antonio Rudiger ayaa sheegay inay jiraan labo xiddig kale oo Chelsea u dheela oo ka dheereeya xiddiga Jarmalka.
Marka la eego qiimeynta ciyaar gacmeedka FIFA 21, Werner ayaa ah xiddiga ugu dheereeya kooxda Chelsea si kastaba Rudiger ayaa sheegay in isaga iyo daafaca amaahda ugu maqan AC Milan Fikayo Tomori inay ka orod badan yihiin weeraryahanka Jarmalka.
“Daacadii aniga iyo Fik [Tomori] ayaa ka orod badan Werner” ayuu Rudiger u sheegay barnaamijka SoccerAM ee Sky Sports.
“Waa laga yaabaa inaynan ka dheereynin 10ka mitir ee ugu horeeya laakiin haddii la sii ordo waa aniga iyo Fik”
Werner iyo Rudiger ayaa isgaranaya muddo dheer iyagoo kuwada jiray kooxda da’yarta Stuttgart, waxay u soo wada dalaceen kooxda koowaad iyagoo haatan dib ugu midoobay Chelsea si la mid ahna kuwada jira xulka Jarmalka.
Rudiger ayaa sheegay inuu ogaa inay kaliya waqti ka xigto inuu Werner noqdo xiddig weyn.
“Haa, waan ogaa sababtoo ah orodkiisa iyo baahida uu u qabo gooldhalinta, waxay ugu timaadaa si dabiici ah” ayuu yiri Rudiger.
“Markii ugu horeysay ee uu yimid Stuttgart, wuxuu ahaa 16 ama 17 sanno jir, tababarka wuxuu ku ahaa mid dheereeya, dhameystirkiisuna aad ayuu u fiicnaa.
“Kaliya waqti ayaa ka xigay inuu noqdo xiddig weyn oo ka ciyaaraya masraxa ugu weyn.”
