Tababaraha kooxda Manchester City ee Pep Guardiola ayaa kooxdiisii hore ee Barcelona kala taliyay magaca macalinka ay tahay inuu kooxdooda hoggaamiyo xilli ciyaareedka dambe.
Guardiola ayaa macalinkaas u doortay tababaraha haatan ee Barca ee Ronald Koeman oo ay dhawaan kulmeen isla markaana wada ciyaareen ciyaarta loo yaqaano Golf-ka.
Guardiola ayaa amaan ugu qubeeyay Koeman iyo waxa uu ka qabtay kooxda xilli ciyaareedkiisii ugu horreeyay isaga oo ku dooday inuu yahay macalinka kooxda saxda ku ah sanadka xiga.
Pep ayaa yidhi isaga oo jooga magaalada Mallorca kana hadlaya barnaamijka Legends Trophy “Isagu waa saaxiibkay, tababarayaashu inta badan waza ay joogaan boos jilcan marka aanaan guulo gaadhin halka ay joogaan boosas xoogan marka aanu guulo gaadhno”
“Waxaan joogay saddex kooxood oo kala duwan laakiin ma jiraan wax u dhigma Barcelona iyo Real Madrid, halkaas oo caqabaduhu ay ka waaweyn yihiin kooxaha kale, halkaas oo waxkasta ay adag yihiin in si hoose loo xakameeyo”
“Waan la hadlay Ronald, isagu waa tababaraha ku haboon xilli ciyaareedka dambe, anigu aad ayaan ugu faraxsanahay madaxweynahana (Joan Laporta) way ka dhaadhacsan tahay midaasi”
