Halyeeyadii kooxaha Manchester United iyo Tottenham ee Roy Keane iyo Jamie Redknapp ayaa muran xooggan oo gaadhay heer xanaaq uu ku dhex maray istuudaha telefishanka Sky Sports ka hor kulanka ay mar dhow labadooda kooxood foodda isku darayaan.
Labadan halyey ayaa falanqaynayay qaab ciyaareedka labada kooxood ee waqtigan, waxaana Roy Keane oo hadalka ku horreeyey uu ku tilmaamay Tottenham koox jilicsan oo sannad walba si fudud looga tuuro afarta sare iyadoo loollan ugu jirta.
Keane oo ahaa kabtanka Manchester United, ayaa amaanay kooxdiisa hore, laakiin waxa hadalladiisa ka gubtay Jamie Redknapp oo khadka dhexe uga ciyaari jiray Tottenham.
Labadoodan oo uu miiska falanqaynta ciyaarta ku wehelinayay Micah Richards ayaa markii dambe xamaasaddoodu kacday, iyagoo hadallo kulul na isweydaarsaday.
Sheekada iyo muranka Roy Keane iyo Jamie Redknapp ayaa u dhacday sidan:
Roy Keane: “Jileec ayaa ku jira kooxdan Spurs.”
Jamie Redknapp: “Finalka Champions League ayay yimaaddeen sannad ka hor, Roy-oow.”
Roy Keane: “Haa, laakiin nasiib ayay ku gaadheen finalka.”
Jamie Redknapp: “Way usoo baxeen, miyaanay sidaas ahayn?”
Roy Keane: “Fiinalka oo aad tagto waxay ka dhigan tahay horyaalka oo aad hoggaaminayso bisha November. Way tageen finalka balse waa lagu soo garaacay. Halkan ma waxaynu u fadhinaa in aynu ka hadalno Mourinho? Haddii aad doonayso in aad gaadho finalka, waa in aad isku daydo in aad guuleysato oo aad dhiigga u hurto wax walba! Marka uu Mourinho ka tago na, wali way sii jilicsanaan doontaa kooxdan Spurs. Sababtu waa ciyaartoyda oo hooseeya.”
Jamie Redknapp: “Imisa sannadood ayay ahaayeen kuwo jilicsan?”
Roy Keane: “Spurs waxay jilicsanayd 40kii sannadood ee u dambeeyey.”
Jamie Redknapp: “Maya, maya, maya. Anigu kulama qabo. Markii ay gaadheen wareegga siddeedda Champions League iyagoo jooga Gareth Bale, Luka Modric, koox fiican ayay ahaayeen. Ma odhan kartid mar walba way liiteen, Roy-oow!”
Roy Keane: “Jamie, haddii uu wareegga siddeeddu guul yahay, waad hesheen guushiina.”
Jamie Redknapp: “Sidaas waad ku odhan kartaa Tottenham, laakiin kooxo wanaagsan ayay soo heshay sannadihii ugu dambeeyey.”
Roy Keane: “Mar walba way liiteen, Jamie.”
Jamie Redknapp: “Uma fiicna sida United oo kale, umay wanaagsanayn sida City oo kale, umay kharash garaynin lacag sida kooxahaas oo kale.”
Roy Keane: “Jileec ayaa ku jira, mar walba waxay ahaanaysaa koox liidata Spurs.”
Jamie Redknapp: “Anigu kuguma raacsani.”
