Xiddiga Bayern Munich Robert Lewandowski ayaa seegaya kulamadii ugu muhiimsanaa xilli ciyaareedka ka dib markii uu dhaawac jilibka ah ka soo gaaray intii uu ku maqnaa xulkiisa Poland.
Ka dib markii uu labo gool ka dhaliyay Andorra isreebreebkii Koobka Adduunka ee maalintii Axada, weeraryahanka ayaa la bedelay saacad markii ay socotay ciyaarta, wuxuuna dib ugu laabtay Bayern Munich si loogu baaro.
Haatan Bayern Munich ayaa shaacisay in Lewandowski uu garoomada ka maqnaanayo muddo afar isbuuc ah taasoo la micno ah inuu seegayo labada lug ee wareega sideed dhamaadka Champions League ee ay kooxdiisa la ciyaareyso Paris Saint-Germain.
Wuxuu kaloo seegayaa kulanka tijaabada weyn u ah Bayern Munich Sabtida ee ay la ciyaarayaan kooxda kaalinta labaad ee Bundesliga ee RB Leipzig kuwaasoo Bayern ka danbeeya afar dhibcood, iyadoo kulankaan uu go’aansan karo horyaalka.
Lewandowski ayaa wacdarro u dhigayay Bayern Munich xilli ciyaareedkan isagoo sidoo kale seegaya kulanka adag ee xulkiisa Poland ay Wembley kula ciyaarayaan xulka England.
Xiddiga ku guuleystay abaalmarinta Xiddiga Sannadka Adduunka ee The Best ayaa dhaliyay 47 gool 42 kulan uu u saftay kooxdiisa iyo wadankiisa xilli ciyaareedkan.
Horyaalka Bundesliga waxa uu dhaliyay 35 gool 25 kulan uu ciyaaray isagoo lix gool u jira rikoodhka goolasha ugu badan hal xilli ciyaareed ee horyaalka oo uu hayo halyeeyga Bayern Munich Gerd Muller, waxaana horyaalka ka harsan sideed kulan.
Kulamada Uu Lewandowski Seegayo:
Marti | RB Leipzig
Minan | PSG
Minan | Union Berlin
Marti | PSG
Marti | Wolfsburg
Minan | Bayer Leverkusen
Marti | Mainz
