Muqdisho (Axadle) – Dowladda Soomaaliya ayaa warqad u qortay UN-ka taas oo ay kaga hadlayso faragalin la sheegay in beesha caalamku ku hayso, oo ay ka mid tahay in farsamo ahaan amniga loogu wareejiyo ra’iisul wasaare Maxamed Xuseen Rooble
Waraaqda ay soo dirtay dowlada ayaa waxaa loo fasirtay siyaabo kala duwan iyadoo dadka ka faalooda arimaha siyaasada ay ku sifeeyeen waxyaabo dhowr ah.
Warqada ay dowlada u dirtay UN-ka ayaa loo fasiray mid ka turjumeysa sida uu madaxweynaha waqtigiisu dhamaaday Maxamed C / llahi Farmaajo uu diyaar ugu yahay in dalka ay ka dhacdo doorasho aan loo dhameyn oo uusan aheyn heshiis dhexmara dhinacyada siyaasada.
Xubnaha Beesha Caalamka ka jooga Soomaaliya ayaa sidoo kale la yaabay warqada ka soo baxday Villa Soomaaliya iyaga oo sugayay in madaxda Soomaalida ay dib ugu noqdaan teendhooyinkoodii, laakiin warqadda ayaa la fahansan yahay inay soo afjartay wada hadallo dheeri ah oo ay la lahaayeen Axmed Madoobe iyo Deni.
Axmed Madoobe iyo Saciid Deni ayaa miiska u saaran inay ka wada hadlaan awoodaha madaxweynaha waqtigiisa dhamaaday, amniga guud ee dalka iyo ka qeyb galka daneeyayaasha siyaasada.
Rajadii laga qabay in Soomaaliya ay ka dhacdo doorasho xor iyo xalaal ah ayaa hoos u sii dhaceysa, waxaana moodaa in hogaamiyaasha Soomaalida ay isku kalsoon yihiin.
Iyada oo ay taasi jirto, haddana bulshada caalamku waxay dhowr jeer ku celcelisay in aan la oggolaan doonin doorasho hal dhinac ah, is barbar socda iyo muddo kordhin ah.
Waxaa muuqata in madaxda Soomaaliya aysan tanaasul sameynin, tanina waxay kordhin kartaa rajada laga qabo in doorasho loo wada dhan yahay.
