Cali Guudlaawe Xuseen iyo Yusuf Axmed Hagar Dabageed oo loo dhiiriyo xilka madaxweynaha iyo ku xigeenka Hirshabeelle.
Hogaamiyaha Soomaaliya Maxamed Cabdullahi Farmaajo iyo hogaamiyaha Maamulka Koofur Galbeed Cabdicasiis Maxamed Xasan Laftagareen iyo Xisbiyadda mucaaradka ah ee UPD iyo Himilo Qaran ayaa u hambalyeeyay Hogaamiyaha iyo Hogaamiye Kuxigeenka cusub ee Hirshabeelle Cali Guudlaawe Xuseen iyo Yuusuf Axmed Hagar oo maanta ku soo baxay codayn ka dhacday xarunta gobolka Shabeellaha dhexe.
Qoraal ka soo baxay Villa Soomaaliya ayaa lagu bogaadiyey Guddoonka, Xildhibaannada Baarlamaanka iyo Guddigii Doorashooyinka Hirshabeelle sida “daah-furnaanta iyo habsami u socodka ah ay ku maamuleen hannaanka doorashadan oo wadajirka ay uga soo shaqeeyeen dhammaan shacabka, waxgaradka iyo masuuliyiinta deegannada hirshabeelle” sida lagu sheegay qoraalka Madaxtooyadda Soomaaliya.
“Waxaan ugu hambalyeynayaa Hogaamiyaha iyo Hogaamiye Ku-xigeenka cusub ee Dowlad Goboleedka Hirshabeelle Mudane Cali Guudlaawe Xuseen iyo Mudane Yuusuf Axmed Hagar xilalka loo doortay maanta, anigoo ka rajeynaya in ay u horseedan bulshada deegaannada Hiirshabeelle xasillooni, amni, midnimo, caddaalad iyo horumar loo dhanyahay” ayuu yiri Hogaamiye Farmaajo.
Hogaamiyaha Koofur Galbeed Soomaaliya Cabdicasiiz Xasan Maxamed Lafta-gareen ayaa dhankiisa u hambalyeeyay hogaanka cusub ee Dowlad-goboleedka Koofur Galbeed Soomaaliya, isaga oo Allah uga baryay in uu ku asturo masuuliyada loo dhiibay.
“Hambalyo Madaxwaynaha iyo Madaxwayne ku xigeenka cusub ee la doortay Hirshabelle Cali cabdullaahi (Guudlaawe) iyo Yusuf Axmed Xagar ( Dabageed) waxaana Alle uga baryayaa inuu ufududeeyo Masuuliyada loo igmaday” ayuu yiri Hogaamiye Laftagareen.
Hasan Sheekh Maxamuud madaxweynihii 7 aad ee Soomaaliya ayaa dhankiisa bogaadiyay doorashada ka dhacday magaaladda Jowhar isaga oo is garab taag u muujiyay Cali Guudlaawe iyo Yusuf Dabageed oo lagu doortay codayn ka dhacday magaaladda Jowhar.
“Hambalyo madaxweynaha la doortay ee Hirshabeelle Cali Cabdullaahi Xuseen (Guudlaawe) iyo Hogaamiye ku xigeenka Yuusuf Axmed Hagar (Dabageed). Waxaan bogaadinayaa dadaalka ay dhammaan qeybaha kala duwan ee bulshadu ku bixiyeen dhismaha maamulka.
Waxaan Alle uga baryayaa inuu u fududeeyo howlaha loo idmaday, aniga oo ku baaqaya in la garab istaago maamulka cusub, si ay u xaqiijiyaan rajada shacabka.” Ayuu yiri Xasan Sheekh Maxamuud hoggaamiyaha Xisbiga UPD.
Xisbiga mucaaradka ah ee Hilimo qaran oo uu hogaamiyo Sheekh Shariif Sheekh Axmed Madaxweynihii 7 aad ee Soomaaliya ayaa u hambalyeeyay madaxweynaha iyo madaxweyne ku xigeenka cusub ee Hirshabeelle.
“Xisbiga Himilo Qaran wuxuu bogaadinayaa dadaalka lagu bixiyay dhismaha maamulka HirShabelle oo uu ugu horreeyaan safarradi nabadaynta ahaa ee uu Guddoomiyaha Madasha Xisbiyada Qaran ahna Madaxweynihi hore ee Dalka Mudane Shariif Sheekh Axmed ugu noqnoqday Magaalo Hogaamiyayaasha Maamulkaas ee Jowhar” ayaa lagu yiri qoraalka Himilo qaran.
Doorashadaan oo aheyd tii ugu xiisaha yareyd dhammaan doorashooyinkii maamul goboleedyada ayaa lagu doortay Cali Guudlaawe Xuseen iyo Yusuf Axmed Hagar Dabageed, maadaama horay loo sii saadilinayay in labadoodu ku soo bixi karaan codaynta Jowhar.
Cali Guudlaawe Xuseen madaxweynaha Cusub ee Hirshabeelle.Yusuf Axmed Hagar Dabageed madaxweyne ku xigeenka cusub ee Hirshabeelle.
