Xaaska uu qabo difaaca reer Brazil ee Thiago Silva ee khadka dambe uga ciyaara Chelsea ayaa waxay baraha bulshada ku karbaashtay weeraryahanka reer Germany ee Timo Werner intii ay socotay ciyaartii Actual Madird iyo Blues ee barbarraha 1-1 kusoo dhamaatay.
Kooxda tababare Tuchel ayaa bandhig fiican samaysay lugta hore ee semi-finalka Champions League, waxaanay la hormartay gool uu ciyaarta oo aan wax badan soconin u dhaliyey Christian Pulisic, laakiin ka hor inta aanu goolkani dhalanin, waxay Blues yeelan karaysay gool kale, iyadoo Timo Werner uu ka khasaariyey kubbad ay goolhaye THibaut Courtois isku kaliyaysteen.
Karim Benzema ayaa goolka barbarraha ah u keenay isla qaybta hore, waxaanay labada kooxood usbuuca dambe ku kala bixi doonaan garoonka Stamford Bridge oo ay labta labaad ku wada ciyaari doonaan.
Timo Werner ayay u ahayd habeen ay tahay in uu illoobo oo aanu wax badan ka xasuusanin, sababtoo ah, waxa uu kooxdiisa u horseedi karayay guul muhiim ah oo siin lahayd fursad si caddaan ah ay ugu soo gudbaan finalka.
Isabelle da Silva oo ah xaaska uu qabo Thiago Silva iyo carruurteeda ayaa ciyaartan ku daawanayay gurigooda, waxaana layaab ku noqotay fursaddii dahabiga ahayd ee uu lumiyey Timo Werner, waxaanay weerar ku qaadday laacibkan.
Muuqaal daawasho ah oo ay soo gelisay barteeda Instagram waqtigii nasashada, waxay Isabelle da Silva ku tidhi: “Kani waa wiil nasiib-daran. Koox kastaaba waxay leedahay weeraryahan goolasha khasaariya…. Wernerkan, muxuu ahaa magaciisu?”
Inyar kaddib ayay Isabelle da Silva muuqaal kale soo gelisay barteeda bulshada iyadoo leh: “Waxaanu u baahanahay gool, waxaanu u baahanahay in aynu guuleysano ciyaartan, laakiin weeraryahanadani ma doonayaan in ay dhaliyaan goolal, ma garanayo sababta ay u dhalin la’ yihiin.
