Tababaraha kooxda Manchester United ee Ole Gunnar Solskjaer ayaa amaanay bandhigii uu kulankii xalay ee Paris Saint-Germain ka sameeyay da’yarka daafaca dhexe ee kooxdiisa ee Axel Tuanzebe oo jeebka ku ritay xiddigo waaweyn oo kooxda ree France ah.
Axel oo kamida da’yarta kasoo baxday kuliyada Man United ayaa mudo 10 bilood ah dhaawac kaga maqnaa Red Devils balse kulankiisii ugu horreeyay ee uu soo laabtay sameeyay bandhig lama filaan ah oo indhaha jamaahiirtiisa xaday.
Man United ayaa ahayd koox cadaadis saaran yahay kahor intii aysan guusha weyn kusoo gaadhin Paris iyagoo laba kamida afar kulan oo Premier League ah oo ay soo ciyaareen guuldarrooyin lasoo kulmay.
Red Devils ayaa xilli hore hoggaanka u qabtay kulanka kaddib rigoore uu shabaqa la gaadhay Bruno Fernandes oo uu marka hore Keylor Navas oo diilinta soo dhaafay ka badbaadiyay balse rigooradii ku celiska ahayd gool u sarifay.
Weeraryahanka United ee Anthony Martial ayaa qabtay shaqadii ay qaban waayeen xiddigaha Paris isaga oo gool si qaldan iskaga dhaliyay kahor intii uusan Marcus Rashford daqiiqadii 87-aad guusha u keenin kooxdiisa.
Xiddigaha bandhiga waaweyn sameeyay ayaa laga xusi karaa Aaron Wan-Bissaka, Fred, Scott McTominay, Alex Telles iyo David De Gea oo xiddiga garoonka loo aqoonsaday balse Tuanzebe ayaa ahaa mid ay adagtahay in la liiciyo oo in badan Mbappe xakameeyay.
OGS oo Tuanzebe ka hadlaya iyo sidii uu uga yaabsaday ayaa yidhi “Axel waxa uu sameeyay wax cajiib ah, waxa uu maqnaa tan iyo kulankii ugu dambeeyay ee aanu Colchester la ciyaarnay, 10 bilood ama wax lamid ah”
“Inuu bandhig sidan oo kale ah kaga hortago Neymar iyo Mbappe, waa inaan idhaahdo isagu ku dhawaad wuu naga yaabsaday”
