Weeraryahanka kooxda Atletico Madrid ee Luis Suarez ayaa ka hadlay haddiiba uu wax hambalyo ah ka helay maamulkii kooxda Barcelona ee ku dhawaad sanad kahor sababta u noqday inuu kooxdaas qaab fool xun uga baxo.
Weeraryahanka 34 sano jirka ah ayaa loo arkay inuu yahay mid dheeraad ku ah baahida tababare Ronald Koeman waxaana loo ogolaaday inuu si toos ah ugu wareego kooxda ay La Liga ku xifaaltamaan ee Atletico Madrid.
Taas ayaa isku bedeshay qalad weyn oo ay gashay Barcelona isaga oo Suarez 21 gool oo horyaalka ah usoo dhaliyay Atletico Madrid isla markaana ku hoggaamiyay kooxdaas ku guuleysiga horyaalka.
Waraysi uu siiyay il-wareedka El Partidazo de COPE ayuu Suarez ku qirtay inuusan marnaba wax hambalyayn ah ka helin maamulkii kooxda ee uu hoggaamiyay Josep Maria Bartomeu iyo tababare Koeman.
Suarez ayaa sheegay inuu bedelka in loosoo hambalyeeyo ku dhawaado inuu isagu sawirka muujinaya inuu horyaalka La Liga ku guuleystay u diro maamulkaas.
Suarez oo la weydiiyay haddiiba uu wax hambalyayn ah ka helay maamulkii Barca ayaa ku jawaabay “Qofna aniga iima uusan hambalyayn laakiin waxaan ku dhawaaday inaan iyaga sawir u diro”
El Pistolero oo hadalkiisa sii wata ayaa duray maamulkii kooxda waxaana uu yidhi “Anigu marnaba kama soo horjeedsan doono Barcelona iyagu waxkasta ayay i siiyeen waxaana ay ii ogolaadeen inaan kamid noqdo xiddigaha ugu fiican laakiin sida cad madaxweynuhu (Bartomeu) waxkasta waxa uu ka yidhi shir jaraa’id halkii uu aniga igu odhan lahaa”
