Tababaraha kooxda Arsenal ee Mikel Arteta ayaa lagu soo warramayaa inuu isku diyaarinayo inuu siddeed kamida xiddigaha kooxdiisa iska diro inta uu furan yahay suuqa xagaagani.
ESPN ayaa sheegaya in kaddib markii khadka dhexe ee Mateo Guendouzi uu kaga biiray dhinaca kooxda Marseille uu Arteta wali doonayo inuu albaabka Emirates Stadium ka saaro tiraba siddeed ciyaaryahan oo kale.
Ciyaartoydaas ayaa lagu sheegay inay kala yihiin Granit Xhaka, Eddie Nketiah, Lucas Torreira, Ainsley Maitland Niles, Alexandre Lacazette, Hetor Bellerin, Reiss Nelson iyo Joe Willock.
Dhinaca kale warbixinta ESPN ayaa sheegaysa in Arsenal ay bar-tilmaameedkeeda koowaad ee ilaa haatan suuqa ka dhigatay Ben White oo ah daafaca dhexe ee kooxda Brighton iyo hal abuuraha Lyon ee Houssem Aouar.
Arsenal ayaa dhinaca kale dhammaystirtay saxeexa daafacii bidix ee kooxda Benfica ee Tavares balse aan wali si rasmi ah u shaacin walow uu ciyaaryahanku maalmo kahor u duulay magaalada London.
Arsenal ayaan xilli ciyaareedka dambe ciyaari doonin wax tartan ah oo Yurub ah maadaama oo ay kusoo dhammaysteen booska siddeedaad ee miiska kala sarreynta Premier League.
