Tababaraha kooxda Manchester City ee Pep Guardiola ayaa shaaca ka qaaday xaqiiqada ah in da’yarka daafaca dhexe ee kooxdiisa ee Eric Garcia uu ku wajahan yahay kooxda Barcelona dhammaadka xilli ciyaareedkan kaddib markii uu xagaagii sanadkii hore dhicisoobay heshiiskaasi.
Garcia oo kasoo baxay kuliyada da’yarta Barcelona ayaa City ku biiray sanadkii 2017 isaga oo dhawaan diiday inuu heshiis kordhin u sameeyo City isla markaana u sheegay inuu qaab xor ah ugu laabanayo kooxdiisii hore,
Garcia ayaa xilli ciyaareedkan kaliya 10 kulan usoo ciyaaray Manchester City isagoon sidoo kale qayb ka ahayn safkii kooxdaas ee shalay League Cup markoodii afraad ku guuleystay kaddib markii ay 1-0 uga adkaadeen Tottenham.
Mar wax laga weydiiyay isbedelka shaxeed ee uu sameeyay kulankii xalay, Guardiola ayay jawaabta su’aashaasi la gashay Garcia oo uu sheegay inuu jecel yahay balse uusan keydka xataa soo fadhiisinin maadaama oo uu kooxda ka tagayo kuna biirayo Barcelona.
Pep ayaa yidhi “Waxa jira ciyaaryahano aan ciyaarin wax kulamo ah, waxaan filayaa tusaale ahaan Eric Garcia kaas oo ah mid kamida ciyaaryahanada dookhayga ah”
“Waxaan jeclaan lahaa inaan haysto 15 Eric Garcia marka aad eegto qaabka uu u dhaqmo, isagu waxa uu markasta ka fikirayaa kooxda”
“Isagu markasta waxa uu leeyahay waji wanaagsan wakhtiyada wanaagsan iyo kuwa xunba, isagu waxa uu caawiyaa tababaraha iyo shaqaalaha tababarka markasta”
“Inta ugu badan isagu keydka kuma jiro sababtoo ah waxa uu tagayaa Barcelona, sidaas ayaan rajaynayaa, way adagtahay laakiin waxay tahay siday tahay uun’
Your browser does not support the audio element.
