Daafaca dhexe ee kooxda Barcelona ee Gerard Pique ayaa kaftan kusoo dhaweeyay saaxiibkiisa cusub ee kooxda ee Eric Garcia xilli uu ka hadlay waxa ay ku kala duwanaan karaan.
Garcia ayaa maray wado aad ugu dhaw mida Pique soo maray bilawgii waayihiisa ciyaareed maadaama oo ay labaduba iyagoo da’yar ka wada tageen akaademiga Barcelona ee La Masia isla markaana kasoo ciyaareen magaalada Manchester.
Pique ayaa usoo ciyaaray Manchester United halka Garcia uu usoo ciyaaray Manchester City iyadoo labada ciyaaryahanba ay koobab kusoo guuleysteen wakhtigooda Manchester.
Dhawaan ayay ahayd markii Garcia oo kaftan hawada u mariyay Pique uu sheegay inuu ka xun yahay in Pique uusan usoo ciyaarin labada kooxood ee Manchester mida wanaagsan oo uu ula jeedo City.
Gerard oo hadda la weydiiyay haddii uu Garcia wadadiisii mari doono ayaa ku jawaabay ‘Haa’ balse ku kaftamay inuu isagu Champions League kula soo guuleystay Man United sanadkiisii ugu dambeeyay balse uu Garcia kusoo guuldarraystay sanadkan oo ahaa kiisii ugu dambeeyay Sky Blues.
Pique oo ka jawaabaya su’aasha ah haddiiba uu Garcia booskiisa dhaxli doono ayaa yidhi “Haa, laakiin kala duwanaanshuhu waa inaan Barca kusoo laabtay kaddib markii aan kusoo guuleystay Champions League isaguna waxa uu soo laabanayaa kaddib markii uu kusoo guuldarraystay.
