Kabtanka kooxda Real Madrid ee Sergio Ramos ayaa lagu soo warramayaa inuu kulan deg-deg ah iskugu yeedhay dhammaan xiddigaha kooxdiisa kaddib guuldarrooyin is raacsan oo ay lasoo kulmeen muddooyinkan ugu dambeeyay.
Real Madrid ayaa kulankii ugu dambeeyay guuldarro 2-0 ah kala soo kulantay Shakhtar Donestk, Ramos ayaa kulanka uu iskugu yeedhay dhammaan xiddigaha kooxda kaga hadlay muhiimada kulanka ay la yeelan doonaan Borussia Monchengladbach ee ugu dambeeya heerka Group-yada Champions League.
Real Madrid oo booska saddexaad ee Group B u daadagtay ayaa ku qasban inay guul ka gaadho Monchengladbach si ay ugu soo baxdo wareega 16-ka ee tartanka.
Los Blancos ayaa gaadhay wareega 16-ka 24-kii xilli ciyaareed ee ugu dambeeyay oo dhan balse cadaadiska ah inay gabi ahaanba hadhaan ama u dhacaan Europe League ayaa ah mid sii kordhaya xilli ciyaareedkan.
Iyagoo soo qaabilay sagaal gool kaddib shan kulan oo wareega Group-yada ah isla markaana ay tahay tiradii ugu badnayd ee laga soo dhaliyay abid tartankaasi gaar ahaan kulamada Group-yada ayuu Sergio xiddigaha kooxda iskugu yeedhay la’aanta tababare Zinadine Zidane.
Wargeyska AS oo ah midka warkan laga soo xigtay ayaa sheegay inuu Ramos yidhi “Hal guul ayaa inaga xigta inaynu gudubno Champions League, nafaheena ayaynu ku tiirsanahay waana inaynu siino waxkasta”
“Tani waa Real Madrid raggoow, inaga oo wada jirna waxa aynu kasoo gudubnay xaalad midan ka xun”
Real ayaa sidoo kale wakhti adag kaga soo jirtay kulamada horyaalka La Liga iyaga oo saddex guuldarro lasoo kulmay 10-koodii kulan ee ugu horreeyay.
Kooxda difaacanaysa horyaalka ayaa booska afraad kaga jirta miiska kala sarreynta horyaalka La Liga isla markaana toddoba dhibcood ka dambeeya Real Sociedad oo hoggaanka haysa.
