Manchester City iyo Chelsea ayay ciyaartoydoodu ku sugan yihiin garoonka Do Dragao ee magaalada Porto, halkaas oo ay ka dhacayso ciyaarta finalka Champions League ee ay labadan kooxood iskugu soo hadheen.
City ayaa markii ugu horreysay timid finalka, waxaanay rajaynaysaa in ay rumayso riyadeeda ah in markeedii ugu horreysay ay qaaddo koobkan, kuna darsato labadii koob ee hore ee ay xilli ciyaareedkan kusoo guuleysatay ee Premier League iyo Carabao Cup.
Chelsea oo sannadkii 2012 koobkan ku guuleysatay ayaa iyaduna markeedii labaad rajayunaysa in ay koobka ku guuleysato, waxaana niyad wanaagsan siiyey xiddigaha Edouard Mendy iyo N’Golo Kante oo kasoo laabtay dhaawacyo.
Pep Guardiola ayaa ciyaarta kusoo bilaabay weeraryahanka reer England ee Raheem Sterling, waxaana sidoo kale shaxda ku jira Ilkay Gundogan oo jug kasoo gaadhay tababarkii Jimcihii kasoo kabtay. Riyad Mahrez iyo Phil Foden ayaa iyaguna ku jira shaxda, halka Kevin de Bruyne uu yahay lama taabtaan.
Difaaca ayay wada taagan yihiin Kyle Walker, John Stones, Dias iyo Zinchenko.
Thomas Tuchel ayaa ciyaartan kusoo bilaabay laacibka khadka dhexe ee N’Golo Kante oo kasoo kabtay dhaawac iyo Edouard Mendy oo labaduba safka garoonka soo gelaya ku jira, waxaase uu tababaraha reer Germany awoodda saaray afka hore oo ay wada hoggaaminayaan Kai Havertz iyo Timo Werner, kuwaas oo uu dhexda ka taageerayo Mason Mount.
Khadka dhexe ayay wada taagan yihiin N’Golo Kante iyo Jorginho, waxaase caawinaya oo garbaha difaaca kasoo guuraya Ben Chilwell iyo Reece James.
Difaaca dhexe ayay kusoo wada bilowdeen Cesar Azpilicueta, Thiago Silva iyo Antonio Rudiger.
Shaxaha rasmiga ah ee labada kooxood
MANCHESTER CITY XI: Ederson, Walker, Stones, Dias, Zinchenko, Gundogan, De Bruyne, Bernardo, Mahrez, Sterling, Foden.
Kaydka: Steffen, Carson, Ake, Jesus, Aguero, Laporte, Rodri, Torres, Mendy, Fernandinho, Cancelo, Garcia.
CHELSEA XI: Mendy, Azpilicueta, Silva, Rudiger, James, Jorginho, Kante, Chilwell, Mount, Havertz, Werner.
Kaydka: Kepa, Caballero, Alonso, Christensen, Pulisic, Zouma, Kovacic, Giroud, Hudson-Odoi, Ziyech, Gilmour, Emerson.
