Real Madrid ayaa qorsheyneysa inay u dhaqaaqdo saxiixa weeraryahanka Juventus iyo Argentina Paulo Dybala iyagoo u bandhigaya inay ku soo bedeshaan Vinicius Junior iyo Isco sida ay sheegayaan wararka ka imaanaya Talyaaniga.
Dybala iyo madaxda Juventus ayaa waxaa haatan u socda wadahadalo qandaraaska loogu kordhinayo iyadoo kooxda Talyaaniga ay dooneyso inay ciyaaryahanka sii ceshato wixii ka danbeeya 2022.
Laakiin Madrid ayaa aaminsan inay 26 jirkaan ku soo jiidi karaan Bernabeu iyagoo u balanqaadaya inuu buuxin doono booskii uu baneeyay Cristiano Ronaldo.
Zidane ayaa heysta ciyaartoy dheeri ku ah qorshihiisa, wuxuuna diyaar u yahay inuu Vinicius Jr. iyo Isco ku soo bedesho Dybala.
Vinicius ayaa marna ka farxiyay marna ka careysiiyay taageerayaasha iyo tababaraha Madrid iyadoo dhawaana ay kaamirada qabatay Karim Benzema oo ka cabanaya xiddiga reer Brazil intii ay socotay kulankii Champions League ee ay barbaraha la galeen Monchengladbach.
Halka Isco uu isna ka dhacay dhanka doorashada Bernabeu, wuxuuna dhawaan soo bandhigay inuusan ku faraxsaneyn xaaladiisa kooxda.
Andrea Pirlo ayaa si weyn u jecel xiddiga khadka dhexe ee reer Spain, waxaana uu hore u sheegay inuu jeclaan lahaa inuu la soo wareego halka Juventus waqti dheer lala xiriirinayay 28 jirkaan.
Madrid ayay u badan tahay inay tartan kala kulmi doonto saxiixa Dybala kooxaha Premier League ee Manchester United iyo Chelsea laakiin madaxda Bernabeu ayaa dareensan inay dalab ay ku jiraan Vinicius Jr. iyo Isco inay soo jiidan doonto kooxda heysata horyaalka Serie A.
