Kooxda kubadda cagta Real Madrid ayaa ku biirtay naadiyada ka faa’iidaystay dhibaatada dhaqaale ee Barcelona, waxaanay lasoo saxeexatay mid ka mid ah xiddigaha kooxdaas ee heshiisyadoodu dhamaadeen.
Real Madrid ayaa dhisanaysa koox ay kaga maarmayso in ay mustaqbalka suuqa geliso lacag, waxaanay soo urursatay ciyaartooyo da’yar iyadoo awoodda saaraysa dhismaha kooxdeeda da’yarta.
Los Blancos ayaa go’aamisay in ciyaartoydeeda da’da yar ee Sergio Arribas, Miguel Gutierrez, Antonio Blanco iyo Marvin Park ay xilli ciyaareedkan si wada-jir ah ugu ciyaaraan kooxda koowaad iyo kooxda labaad intaba, laakiin waxay kusoo kordhiyeen safkooda hal ciyaartoy oo kale oo si xor ah ay ugala soo wareegeen Barcelona.
Kabtankii kooxda Barcelona ee 19 jirrada ee Jaume Jardi ayay Real Madrid si rasmi ah u shaacisay inay heshiis la gaadhay oo uu ka mid noqonayo kooxdeeda.
Heshiiskii uu Jardi kula jiray Barcelona ayaa dhamaaday maalintii ugu dambaysay bishii hore ee June, waxaana ka ambobaxay naadigaas kaddib markii ay isla gaadhi waayeen heshiis cusub.
Dhaliye cajiib ah
Jaume Jardi ayaa ahaa ciyaartoygii ugu goolasha badnaa kooxda da’yarta Barcelona xilli ciyaareedkii hore, waxaanu u dhaliyey sagaal gool iyo saddex kale oo uu caawiye ka noqday.
Taageereyaasha kooxda ayaa u arkayay in uu yahay ciyaartoyga mustaqbalka kooxda iyadoo uu kooxda koowaadna la qaadanayay tababarka oo uu marar badan kasoo garab muuqday Lionel Messi, laakiin da’yarkan ayay u muuqatay in aanu boos ka helayn Barcelona waqtigan, sidaas ayaanu ku gaadhay go’aan ah inuu iskaga tago.
Raul Gonzalez ayaan ka habsaamin inuu da’yarkan ku qanciyo inuu kusoo biiro Real Madrid Castilla.
Waxa kale oo ay Real Madrid lasoo saxeexatay laacibka da’da yar ee Javier Villar oo 18 jir ah, ayna walaalo yihiin laacibka Roma ee Gonzalo Villar. Saxeexa Villar ayay Real Madrid kaga adkaatay Inter Milan.
