Da’yarka kooxda Paris Saint-Germain ee Kylian Mbappe ayaa amaan ugu qubeeyay dhigiisa Manchester United ee Kylian Mbappe kahor kulanka adag ee ay labada kooxood caawa ku kulmi doonaan Parc des Princes ciyaar qayb ka ah wareega Group-yada ee UEFA Champions League.
Kooxda tababare Ole Gunnar Solskjaer ayaa wajahaysa loolanka ugu adag ee ay la kulmayaan ilaa haatan xilli ciyaareedka kulanka ay caawa martiyataan kooxda kusoo guuleysatay horyaalka Ligue 1.
Mbappe iyo Rashford ayaa labaduba furayaal u noqon doona safafka weerarka ee kooxahooda iyagoo uu midkasta isku dayi doono inuu kooxdiisa saddexda dhibcood usoo gacan geliyo.
Kahor kulankooda caawa, Mbappe oo amaanay Rashford ayaa ku sifeeyay inuu yahay mid kamida weeraryahanada ugu halista badan England isaga oo dhinaca kale xusay inuu Paul Pogba uga sheekeeyo marka ay xulka France wada joogaan.
Kylian Mbappe oo u warramay wargeyska The Mirror ayaa isaga oo Rashford ka hadlaya yidhi “Isagu waa mid kamida weeraryahanada ugu halista badan England”
“Paul Pogba ayaa ka hadlay sida uu isagu khaaska u yahay isaguna (Pogba) ciyaartoyda ugama hadlo qaabkaas”
Sidoo kale Mbappe ayaa amaanay wacyigelinta uu ka wado Rashford gudaha UK gaar ahaan inuu dhawaan dawlada dalkaasi ku qasbay inay ka laabtaan go’aanka ay cuno bilaash ah kaga jarayeen caruurta dugsiyada dalkaas wax ka dhigta.
Rashford ayaa goolka guusha oo rigoore ahaa kasoo dhaliyay Paris Saint-Germain markii ugu dambaysay ee ay booqdeen Parc des Princes xilli ciyaareedkii 2018-19 iyagoo qaab cajiib ah ugu gudbay wareega siddeed dhammaadka.
