Georgina Rodriguez oo ah saaxiibta Cristiano Ronaldo ayaa ka jawaabtay su’aal la xidhiidha mustaqbalkiisa xilli ay jiraan warar sheegaya inuu iskaga tagayo kooxdiisa Juventus suuqa xagaaga sanadkan.
Ronaldo ayaa lala xidhiidhinayaa kooxo laga xusi karo Manchester United oo uu horeba ugu soo ciyaaray iyo Paris Saint-Germain kaddib markii uu niyad jab ku noqday xilli ciyaareedkii dhammaaday ee 2020-21.
Sidoo kale kooxaha lala xidhiidhinayo Cristiano ayay kamid tahay kooxdii uu xirfadiisa ciyaareed kasoo bilaabay ee Sporting Lisbon oo ay hooyadii dhawr mar sheegtay inay isku dayi doonto inay ku qanciso inuu ku biiro.
Wakiilka Ronaldo ee Jorge Mendes oo hadalka Ronaldo hooyadii kaddib saxaafada la hadlay ayaa sheegay inuu CR7 jecel yahay Sporting balse uusan qorshihiisa haatan ahayn ku laabashada Portugal.
“Isagu wuu joogayaa” ayay ku jawaabtay Georgina Rodriguez mar uu shaqsi muuqaal ka duubay iyada oo socota weydiiyay mustaqbalka Ronaldo taas oo meesha ka saaraysa wararkii bixitaanka lala xidhiidhinayay.
Ronaldo ayaa Juve kula guuleystay dhammaan koobabka gudaha Talyaaniga ee kala ah Serie A, Copa Italia iyo Italian Super Cup balse aan wali la gaadhin hammigiisii ugu weynaa ee ahaa inuu UEFA Champions League la hanto.
Kaddib saddex xilli ciyaareed oo uu hadda si buuxda ugu soo ciyaaray, Juve ayaa ku hadhaysay wareegyada hore ee Champions League.
