Arsenal ayay dhibaato weyni kasoo gaadhay rabitaankeeda ah inay doonayso saxeexa khadka dhexe ee xulka Talyaaniga ee Manuel Locatelli kaas oo si cad u sheegay inuu xiisaynayo ku biirista Juventus oo dhinaceeda ka dalbanaysa.
Locatelli ayaa ahaa mid kamida xiddigaha ugu qaab ciyaareedka fiican ee Euro 2020 isaga oo kasoo caawiyay Talyaanigu inay kusoo guuleystaan ugu dambayn tartankaas.
Arsenal ayaa ah mid kamida kooxaha sida ugu weyn loola xidhiidhinayay saxeexa 23 sano jirkaas laakiin Juve ayaa dhinaceeda loolanka kaga jirta.
Locatelli ayaa sheegay inuu mustaqbalkiisa meel iska dhigay si uu diirada u saaro Euro 2020 balse haatan uu la dhacsan yahay xiisaha uu ka helayo Juventus oo uu wadahadalo kula jiro isla markaana uu markale toddobaadkan la kulmi doono.
Locatelli oo mustaqbalkiisa ka hadlayay kaddib markii uu dalka Talyaaniga ku laabtay ayaa Sky Sports Italia u sheegay “Ilaa haatan anigu dhab ahaan kamaan fikirin, kamaan fikiri karayn”
“Xiisaha ka imanaya Juventus waa mid i farxad gelinaya, iyagu waa koox cajiib ah waxaanan sidaas idhi dhawr mar”
Locatelli ayaa Azzurri laba gool usoo dhaliyay shan kulan oo uu Euro usoo ciyaaray balse lasoo kulmay wakhti adag markii uu rigoore khasaariyay kulankii ay Spain kasoo gudbeen afar dhammaadkii.
Manuel ayaa sheegay inuu wakhtigaas adag kala soo dabaashay kabtanka Xulka iyo kooxda Juventus ee Giorgio Cheillini kaas oo u sheegay inay guuleysanayaan.
