Weeraryahanka kooxda Lyon iyo xulka qaranka Netherlands ee Memphis Depay ayaa lagu soo warramayaa inuusan ku biiri doonin kooxda Barcelona haddii uu ka baxo tababare Ronald Koeman.
Depay ayay dalka Holland kasoo wada jeedaan Koeman waxaana ay kasoo wada shaqeeyeen mudo xulka Netherlands iyaga oo halkaas si fiican iskugu garanaya.
Hore ayuu tababare Koeman u sheegay sida uu u doonayo saxeexa Depay isaga oo xusay in awooda jidh ahaaneed ee xiddiga Lyon ay tahay waxa ka maqan weeraryahanada kooxdiisa Barcelona.
Depay ayuu heshiiskiisa Lyon yahay mid dhacaya dhammaadka xilli ciyaareedkan isaga oo maanta u ciyaaraya kooxdaas kulankiisii ugu dambeeyay ee mudo afar sano ah oo uu ka tirsanaa.
Memphis ayaa lala xidhiidhinayay Barcelona mudo dheer balse caqabada ayaa ah in tababare Koeman oo ahaa shaqsiga kusoo jiidayay kooxdaas uu mustaqbalkiisa shaki ku jiro.
Koeman ayaa xilli ciyaareedkan Copa Del Rey kula soo guuleystay Barca balse wareega 16-ka kaga hadhay Champions League sidoo kalena booska 3-aad kaga dhammaystay La Liga.
Madaxweynaha Barca ee Joan Laporta ayaa shaqada ka caydhin kara Ronald isaga oo toddobaadkan sidii uu balanqaaday bilaabaya go’aano xidhiidh ah oo uu kooxda wax kaga bedelayo.
